Wararka laga helayo magaalada Gaalkacyo ayaa sheegaya in xiisad colaadeed ay ka taagan tahay magaaladaasi.
Arrintan ayaa ka danbeysay kadib markii Galmudug ay damacday inay saldhig Boolis ka dhigtaan Galbeedka xaafadda Garsoor ee hore loogu dagaalamay, taasoo ay hor istaageen ciidamo ka tirsan Puntland.
Ciidamo badan oo ay halkaasi geysay Galmudug ayaa keenay inay dhinaca Puntland ay sidoo kale ciidamo keenaan, waxaana la sheegay in labada ciidan ay isku hor fadhiyaan halkaasi, iyadoo rasaas goosgoos ahna laga maqlay saaka.
Ma jirto wax war ah oo ka soo baxay maamulada Galmudug iyo Puntland, iyadoo dadka magaalada ka cabsi qabaa in dagaal kale ka dhex qarxo labada dhinac.
Puntland ayaa dhowaan ku dhawaaqday in gaadiidka ka yimaada Koonfurta Soomaaliya aanu u gudbi doonin degaanada Puntland oo uu ku ekaan doono Gaalkacyo laga bilaabo 1-da September arrintaas oo si weyn loo cambaareeyay.
Wadani.com
