Waxaa maanta dib loo dhigay ciyaartii fiinaal-ka Maamul Goboleedyada iyo Gobolka Banaadir, kadib kulan ay yeesheen Wasiirka ciyaaraha , maamulka G/Banaadir, xiriirka Ciyaaraha K/cagta iyo Taliska Booliska.
Ciyaarta kama danbeysta ah ee dhex mareysa xulalka Galmudug iyo Gobolka Banaadir ayaa la shaaciyey inay dhici doonto Khamiista Berri, iyadoo lagu qaban doono Garoonka Eng. Yariisow (Ex. Banaadir) ee magaalada Muqdisho.
Dib u dhaca ku yimid ciyaarta ayaa sabab looga dhigay burbur gaaray shabaqyadii Garoonka iyo qeybo ka mida garoonka markii rabshado ka dhaceen ciyaartii G/Banaadir iyo Koonfur Galbeed.
Maamulka Galmudug ayaa ka hor yimid dib u dhigista aan lagala tashan ee lagu sameeyay ciyaartii maanta dhici lahayd, waxayna ka digeen inaysan ka qeybgeli doonin ciyaartaasi haddii laga dib dhigo Khamiista oo hadda loo qabtay inay dhacdo.
“Maanta cayaartii kama danbaysta aheyd ee xulalka Galmudug iyo Banaadir dhexmari laheyd yaa noo fasiri kara sababta dib loogu dhigey? Yaase lahaa awoodda dib u dhigista? Xiriirka kubadda cagtu waa in uu jawaab u helaa arrinkaan!.!Koobka caaway waxaa laga sugayey caasimadda Galmudug, dib u dhac intaa ka badan lama aqbali karo iyo wararka kale ee la sheegayo!” Axmed Macalin Fiqi- Wasirka Amniga Galmudug
Sababo dhinaca amniga ah ayaa la sheegay in ciyaarta loogu qaban waayey garoonka weyn ee Stadio Muqdisho, iyadoo Garoonka Eng. Yariisow uu qaadi waayey taageerayaasha ciyaaraha.
