Madaxweynihii hore Galmudug C/kariin Xuseen Guuleed ayaa qeylo dhaan uu ka soo saaray xaaladda Galmudug ku taliyay in xaaladda wadaxaajood lagu dhammeeyo oo caqligu taliyo.
Wuxuu sheegay in dhibaato badan laga soo maray dhismihii maamulkaasi, isal amrkaana halisyo badan ku wareegsan yihiin, loona baahan yahay in caqligu taliyo, isagoo baaq u diray dowladda Federaalka.
HOOS KA AKHRI FARRIINTA
Waxaan wada ogsoonahay in Maamulka Galmudug iyo maamul gobaleedyada kalaba dhismahoodii laga soo maray dhibaatooyin iyo hawlo aad u faro badan waana maamulo curdun ah oo u baahan gardaadin iyo kobcin, gaar ahaan maamulka Galmudug oo ah maamul ay ku hareeraysan yihiin qataro aad u faro badan oo jiritaankiisa halis ku ah.
Haddaba waxaan dhamaan dhinacyada oo idil u soo jeedin lahaa inuu caqligu taliyo waxii khilaaf iyo kala aragti duwanaasho ah ee jirana wadahal iyo wadaxaajood lagu xaliyo, wax kasta oo dagaal iyo gacan kahal keeni karana laga fogaado iyo waxii halis galin kara jiritaanka iyo aayaha Galmudug.
Dowladda dhexe mas’uuliyad gaar ah ayaa ka saarin dhowridda iyo ilaalinta xasiloonida siyaasadeed iyo tan amni ee dowlad gobaleedyada xubinta ka ah Dowladda Fedaraalka, sida uu xil oga saaran yahay ilaalinta jiritaanka nidaamka fedaraalka ee maamulka dowliga ahi uu ku dhisan yahay Soomaaliduna ku heshiisay, haddaba waxaa dowladda laga doonayaa inay mas’uuliyadeeda qaadato oo ay kaalin waalidnimo ka ciyaarto mashaakilaadka ka jira ama ka jiri karo dowlad gobaleedyada dalka, waana inay ugu yaraan dowladdu ku shaqeyso oraahdo caanka ah ee ay bahda caafimaadku adeegsadaan kuna dawlgalaan oo ah ” Walba haddii aadan wax u kordhinaynin bukaanka ha uga darin “
