Kulankii baarlamaanka ee maanta lagu waday in cod loogu qaado mooshinka laga keenay Baarlamaanka KMG ah ee loo dhisay Jubba ayaa mar kale maanta u baaqday kooram la’aan kadib markii muddo dheer la sugayay in kulankaasi qabsoom oo la sheegay in qaraxyo laga cabsi qabo inay hareeraha xarunta baarlamaanka ka dhacaan.
Guddoomiyaha baarlamaanka ayaa markii danbe yimid xarunta Baarlamaanka, taasoo ka dambeysay markii ay ku adkeysteen xildhibaanno 100 xubnood ku dhow in shirku qabsoomo oo codka la qaado. Guddoomiye Maxamed Sheekh Cusmaan (Jawaari) ayaa kulanka markii uu furay ka akhriyay qoraal uga yimid xukuumada Soomaaliya oo ay ku codsaday in arrinta mooshinka iyada waqti kooban la siiyo si ay u soo xaliso.
Codsigaas waxaa ka hor yimid xildhibannada Baarlamaanka, waxayna diideen in mooshin cod qaadis maraya dib loo celiyo iyagoo guddoomiyaha ka dalbaday inuu codka qaado, muddo kadib waxaa meesha ka dhacay qorshe kale oo xildhibaanada qaarkood si hoose loola hadlay kadibna ay shirka isaga tageen, waxaana markii la tiriyay tirada xildhibaanada shirka fadhiyay si codka loo qaado la waayay kooram cod qaadi kara.
Guddoomiyaha Baarlamaanka ayaa markaas kadib ku dhawaaqay in kooram la’aan ay jirto lana qaadi karin codkii loo balansanaa sidaasi oo shirkii lagu xiray. Madaxda sare ee dowladda ayaa la sheegay inay si toos ah xaaladda u soo farageliyeen oo xildhibaannada iyo wasiirada xildhibaanada ah ugu baaqeen inay ka baxaan shirka si looga badbaado cod loo qaado mooshinka oo xaaladiisu cakiran tahay.
Shirar is daba joog ah ayaa hadda ka socda madaxtooyada iyadoo madaxda sare ay doonayaan inay kala furfuraan mooshinkan oo qarka u saaran inuu kala fogeeyo maamulka Jubba iyo dowladda Federaaalka.
Goobjooge.com
[ad name=”HTML-1″]
[ad name=”HTML-6″]
