Nin hubeysan ayaa rasaas ku furay dad ku sugnaa Baar ku yaalla gobolka California ee dalka Mareykanka, iyadoo dad badan lagu laayey halkaasi.
Wararkii ugu danbeeyay ayaa sheegaya in 12 qof ay ku dhinteen toogashada habeenkii Arbacada waqti danbe xilliga dalkaasi ka dhacday Baar lagu caweeyo oo ku yaalla Borderline Bar & Grill oo ka tirsan magaalada Thousand Oaks, oo 60 KM Galbeed ka xigta magaalada Los Angeles.
Ninka falkan geystay ayaa ka mida dadka dhintay, waxaana Kabtan Garo Kuredjian oo ka tirsan booliska Ventura County uu sheegay in dadka dhintay uu ku jiro mid ka mid ah ku xigeenadiisa. Waxa uu sidoo kale xaqiijiyey in ninka toogashada fuliyey lagu dhex dilay baarka.
Waxa kaloo dhaawac ka soo gaaray 15 kale, iyadoo ay baaritaan wadaan Booliska, waxaana tani ay noqoneysaa weerar kale oo qof hubeysan ka geystay dalka Mareykanka, waana kii labaad in ka yar 2 toddobaad.
