Qasaaraha dhimashada iyo dhaawaca ka dhashay Qaraxyo waaweyn oo maanta lagu weerarray Xarunta Wasaaradda Waxbarshada ee magaalada Muqdisho ayaa sii kordhay.
Qaraxa hore ayaa lala beegsaday xarunta Wasaaradda Waxbarashada oo ku dhow Isgoyska Soobe, waxaana qaraxa hore kadib muddo 10 daqiiqo ah dhacay qarax kale oo dhaliyey qasaaraha ugu badan, waxaana qaraxa danbe uu beegsaday dadkii gurmad u tegay qarixii hore.
Dadka ku dhintay qaraxa Taliyihii Saldhigga degmada Hodan Xuseen Cadceed Cismaan iyo Weriye Maxamed Ciise Koonaa. Waxaa ku dhaawacmay dad badan oo ay ka mid yihiin weriyeyaasha C/qaadir OK oo u shaqeeya VOA iyo Feysal Cumar oo sawir-qaade u ah Wakaalada Wararka Rueters oo goobta u tegay qarixii koowaad.
Ciidamo badan ayaa la geeyay goobta qaraxu ka dhacay, waxaana muuqaaladii ugu horeeyay ay muujinayaan burbur xoog leh oo gaaray dhismaha Wasaaradda iyo Gaadiid fara badan oo wadadda marayey.
Qasaaraha ayaa sii kordhaya iyadoo dhaawacyada qaraxyada la geeyay isbitaallada Muqdisho, waxaana socda Gurmad iyo baadi goobka dadka maqan ee lagu waayey qaraxyada waaweyn ee ka dhacay caasimadda.
