Wararka laga helayo magaalada Gaalkacyo ayaa sheegay in Caawa ay hawada ka maqan tahay isgaarsiintii magaaladaasi, taasoo keenay shaqo la’aan soo wajahday xarumihii ganacsiga.
Addeega isgaarsiinta shirkadda Hormuud ayaa istaagay galabta gelinkii danbe magaalada Gaalkacyo, waxayna taasi keentay inuu sidoo kale joogsado isticmaalkii lacagaga Mobile-da la isugu diro, taasoo dhalisay inuu cakirmo ganacsigii magaalada.
Dad kala duwan oo magaalada Gaalkacyo ku sugan iyo ganacstada ayaa sheegay inay joojiyeen wax iibsigii, iyadoo Baararka qaarkood ay si damiin ah raashika ku bixinayeen, waxayna dadka qaarkood baraha bulshada ku soo bandhigeen xaaladda heysata ee ah inaysan lacagtoodii ka qadayaan.
Gaalkacyo iyo magaalooyin kale ayaan laga isticmaalin shilin Soomaaliya, waxayna ganacsiyada iyo dadka caadiga ahba adeegsadaan lacagaha Mobile-ka la isugu diro.
Muddo 5 saacadood ah, kadib ayaa la sheegay inay dib u soo laabatay isgaarsiinta, iyadoo aan la sheegi sababta dhalisay inay hawada ka baxdo isgaarsiintii magaalada, mana jiraan cid ka hadashay arrintan.
