Wararka laga helayo Gobolka Shabeelaha Hoose ayaa sheegaya in dagaallo qaraar ay halkaasi ku dhex marayaan maleeshiyada Alshabaab iyo dad Beeraley ah.
Dagaalka ayaa la sheegay inuu bilowday kadib markii maleeshiyo ka tirsan kooxda Alshabaab ay xoolo badan oo Ari ah ka qaateen beeralayda.
Dadka Degaanka ayaa dagaal la galay maleeshiyada si ay xoolahooda uga soo dhacsadaan, waxayna dagaaladu ku fideen degaano badan oo ka mida Gobolka.
Xoolaha Alshabaab ka dhaceen Beeraleyda ayaa la sheegay inay ka badan yihiin 500 neef oo iskugu jira Ido iyo Riyo.
Degaanada ay dagaaladu ka socdaan waxaa ka mida Bariire, Awdheegle iyo degaanada la xiriira waxaana sii xoogeysanaya dagaalka oo markii danbe ku fiday degaanada lambar 50 iyo lambar 60.
Dhowaan ayay ahayd markii Xoolo dhaqato iyo Alshabaab dagaallo culus ku dhex mareen Gobolka Jubbada Hoose, gaar ahaan duleedka magaalada Kismaayo kadib markii Alshabaab ay xoolo badan oo Geel ay ka qaaday xoolo dhaqatada.
Wadani.com
