Waxaa sii xoogeystay dagaal maanta ka qarxay magaalada Boosaaso ee Gobolka Bari. maamulka Puntland.
Dagaalka ayaa u dhaxeeya ciidamada Puntland iyo ciidamada PSF ee ka amar qaata Taliyaha ciidamadaasi Maxamuud Cismaan Diyaano oo diday inuu xilka wareejiyo, kadib xil ka qaadistii uu ku sameeyay Madaxweynaha Puntland.
Iska hor imaadka labada dhinac oo ku bilwoday si goosgoos ah ayaa sii xoogeystay markii danbe, waxaana ciidamo fara badan ay ku sugan yihiin aaggaga xaafadda Ridwaan ee la isku horfadhiyo.
Qasaaraha hordhaca ayaa sheegaya in dad rayid ah iyo askar ay waxyeelo kasoo gaartay, waxaana xaafadaha ka qaxaya dadkii deganaa, halka Isbitaallada la geeyay dad shacab ah oo rasaasta ay ugu tagtay xaafadahooda.
Dagaalka ayaa saameyn ku yeeshay Xarunta ciidamada PSF, Madaxtooyada magaalada Boosaaso iyo aaggaga ku dhow, iyadoo labada ciidan ee dagaalamya ay aad isugu dhow yihiin.
Ciidamada dowladda ayaa xiray Koontaroolada laga galo magaalada, waxaana la arkayaa ciidamo gurmad ah, halka ciidamada PSF ay ka dagaalamayaan xaruntooda magaalada Boosaaso.
Dagaalka oo qarxay Barqanimadii ayaa socda galabta maqribta, iyadoo weli ay rasaastu socoto, ayna meelaha qaar sii xoogeysatay markii la sheegay in ciidamada dowladda dib loo riixay.
Dagaalka ayaa salka ku haya khilaafka ka dhashay Agaasimihii xilka laga qaaday ee hay’adda PSF Maxamuud Cismaan Diyaano. PSF ayaa ah ciidamo uu tababarray Mareykanka, waxaana shaqeyn waayey waanwaan ay wadeen dhinacyada dhaqanka Gobolka Bari.
