Iyadoo inta badan dalalka Muslimka iyo Carabta ay maanta sooman yihiin ayaa waxaa laga ciiday dalal fara-ku-tiris ah oo ay Soomaaliya ka mid tahay, waxaana la filayaa in Berri oo Axad ah 24-ka May 2020 dunida Islaamka si weyn loogu dabaalgeyo munaasabadda Ciidul firtriga.
18 Dal oo ka mida Jaaamacadda Carabta ayaa laga sooman yahay maanta, iyagoo xalay shaaciyey inay dhammeystirayaan 30-ka maalmood ee Ramadaan, markii ay waayeen dhalashada Bishii Shawaal; laakiin waxaa inay Ciid tahay ku dhawaaqay dalalka Soomaaliya iyo Mauritania oo noqday kuwa kaliya ee laga ciiday.
Dalalka maanta sooman maalintii 30-aad ee Ramadaanka ayaa kala ah: Sacuudiga, Kuwait, Qatar, Imaaraadka Carabta, Baxreyn, Masar, Jordan, Algeria, Djibouti, Comoros, Ciraaq, Syria, Lubnan, Yeman, Falastiin, Libya, Tunis. dalalkan ayaa maalinta Berri ee Axadda u dabaaldegaya Ciidul fitriga.
Waxaa kaloo Berri ay ciid u tahay dalalka Turkiga oo iyadu ku soonta xisaabaadka Falaga ama cilmiga xiddigiska iyo dalalka waaweyn ee islaamka sida Indonesia, Malaysia, Pakistan iyo dalalka kale ee Aasiya.
Dalalka Somalia iyo Mauritania ayaa dhinacooda ku dhawaaqay inay maanta oo Sabti ah u tahay Ciidul fitriga, iyadoo dowladda Soomaaliya ay bedeshay go’aankeedii hore ee ahaa in Sabtida la dhameystirayo bisha Ramadaan.
Dowlad Goboleeyada, maamullada Soomaalida iyo Alshabaab ayaa maanta ku wada dhawaaqay inay tahay Ciid, laakiin waxaa ku kala qeybsamay dadka iyadoo qeyb ka mida ay sooman yihiin oo ay Berri ciidi doonaan.
Waxaa jira dalal kale oo Ramadaanka bilaabay Sabtidii 24-ka April sida: Cumaan, Suudaan iyo Marooko, kuwaasoo ay maanta u tahay 29-ka Ramadaan, waxayna bisha raadin doonaan Caawa oo Sabti ah, waxaa sidoo kale dalalkaas la mida oo maanta uu 29 u yahay Ramadaanka Shiicada Ciraaq iyo Shiicada Lubnaan.
Dalalka Afrika ee muslimiinta ku nool yihiin, lagana ciiday maanta waxaa ka mida: Mali, Senagal, Niger iyo Ivory coast.
Waxaa xusid mudan in dalalka islaamka intooda badan aan salaadda ciida lagu oogeynin fagaarayaasha iyo masaajidda, iyadoo dadku ku jiraan Guryahooda cudurka Coronavirus awgiis.
