Wasaaradda Caafimaadka Dalka Qatar ayaa ku dhawaaqday in dalkaasi maanta laga helay 238 qof oo qaba cudurka Coronavirus, iyadoo tirada guud ee dadka cudurka qaba dalkaasi ay gaartay 262 qof.
Dadkan cusub oo ah tiradii ugu badneyd ayaa lagu soo saaray kadib markii baaritaan lagu sameeyay dad gaaraya 6000 qof oo ay xiriir is-dhexgal ah la yeesheen dad hore loogu karaantiilay cudurkan, waxaana dhammaan dadkaasi la sheegay inay la karaantiilay oo xaaladooda ay degan tahay marka laga reebo ha qof.
Hore dalka Qatar waxaa cudurka Coronavirus u qabay 24 qof oo u badnaa dad kasoo laabtay dalka Iran oo ay ku jiraan ajnabi, laakiin waxaa ay saameyn ku yeesheen dad kale, waxaana maalin qura la helay 238 qof oo cudurkani qaba.
Qeybtii ugu horeysay ee dadka ka caafimaaday Cudurkan ayey shaacisay dowladda Qatar in Berri ooda laga qaadi doono.
Hay’adda Caafimaadka adduunka ee WHO ayaa ku dhawaaqday in Coronavirus uu yahay musiibo heer caalami ah, waxayna shaacisay in guud ahaan dunida ay hadda cudurka qabaan in ka badan 118,000 qof, isla markaana ay u dhinteen 4200 qof, wuxuuna ku faafay in ka badan 114 Dal. balse waxaa ka bogsooday 66,000 qof.
