Kuma soo koobi karo dareenkayga qormo yar ee aan halkaan kusoo gudbiyo oo keliya waxaa i huraya oo i ololaya qalbiga, waxaan la’nahay wiil yaraheena walaalkay Mustafa Aadan Sheekh Cabdi, mudo ku dhow laba sanno.
Nin dhalinyaro Soomaaliyeed oo magaciisu yahay Mohamed Aadan Sheekh Abdi, ayaa qoraalkan oo uu ii soo direy sidaas ku bilaabay waxaana uu iga codsaday inaan la wadaago axsaabta ku xiran boggeyga Facebook, waxuuna isagoo arimahan kasii hadlaya uu yiri:
Walaalkay iga yar Mustafa Aadan Sheekh Cabdi, kuma aanan heynin nolol iyo geeri toona laga soo bilaabo dabayaaqadii sanadkii 2019 kii.Wax kabadan sanad iyo bilooyin kadib oo aan la’ayn walaalkey Mustafe, bishii saddexaad ee sanadkaan ayaa waxaa isoo baaqey telefoon dheer oo ka kooban toban jiifar ama nambar, waana wacay waxa ugu horeeyey ee uu walaalkey igu dhahay waxay ahayd “Aboowe Maxamed waa walaalkaaga Mustafe, waxaan ku suganahay dalka Eriterea oo ay dowladu tababar inoogu qaadey, walaal tababarkii waa inoo dhamaadey mana jirto cid na magac heysa oo na leh waa la idin qaadaa iyo in kale, walaal xaalad adag ayaan ku jirnaa ee Fadlan qur’aan inoo soo akhriya alle meeshaan anagoo nabad hanaga soo wadee…!!!!
Waxaan ugu jawaabay waayahay walaal wax walbo oo aan awoodno waan idin sameynaynaa adiga iyo dhamaan dhalinyarada Soomaaliyeed ee kale oo meeshaas ku hoogsan, ee alle ha idin amaansado oo ha ina wada mideeyo mar kale anagoo nabad ah…!!! GAF lacagtii baa go’day.
Habeenkii baan mar kale wacay si aan hooyo iyo qaar kamid ah ehelka ula hadalsiiyo balse mudo dheer ee uu i lahaa telka waa mashquul, lama heli karo iyo waa khalad IWM maadaama wadankaas ay isgaarsiintiisu wanaagsaneyn, halmar buu ii dhacay telefoonkii kadib waxaa iga qabtay wiil Soomaali ah waxaan weydiiyay magaca wiilka aan raadinayey wuxuu ii sheegay inuusan u dhaweyn telkana uu ka dhaxeeyo boqolaal tababar ku jirta oo ku sugan xeradaas ciidan, islamarkii wiilka wuxuu iga codsaday inaan u xiriiriyo Hooyadiis oo xamar ku sugan si uu dhibkiisa ugu sheegto waan u xiriiriyay halkaas ayay isaga iyo hooyadiis farxad iyo reyn reyn isla dhaceen kadibna lacagtii baa iga go’day.
Marar badan oo kale ayaan telkaas wacay waxaa la igu dhahayey walaalkaa inooma dhowa ee walaal hooyadey oo meel hebel joogta ii xiriiri, waxaan sabab u noqday in ka badan toban ruux oo aysan waalidkood nolol iyo geeri midna ku heyn inaan isla hadalsiiyo, inkastoo walaalkay markii kadib aanan helin hadana waan ku faraxsanahay inaan dad soomaaliyeed oo kala lumey isla hadashiiyo.
Shalay oo ay taariikhdu ahayd 05/06/2021 saacaduna ku beegneyd 11:41 am oo barqanimo waxaa iisoo baaqey telfoon lamid ah midka aan kor kusoo xusey, ilaa xalay habeenkii barkii oo aan wacayey kadib mar qura ayuu ii galey telfoonkii waxaana is haleelnay walaalkey Mustafe oo aan waxbadan iska wareysanay oo ii sheegay in xeradii hore laga soo kaxeeyay lana geeyay xero aad uga fog magaalada.
Waxaa kale oo ii sheegay Mustafe in in kabadan 100 dhalinyaro ah ka baxsadeen xerooyinka kadib markey u dulqaadan waayeen dhibaatada meeshaas ku heysata, wuxuu kaloo ii sheegay in dhalinyartaas qaar badan oo kamid ah la dhaawacay, la diley halka qaar kaloo badan xabsiyada la dhigay.
Walaalkay Mustafe dhibaatooyin fara badan ee halkaas ku heysta buu iiga sheekeeyay ee alle haka soo baxsho walaalkayga iyo inta lamidka ah ee halkaas ku dhibaateysan
.
Ugu dambeyn waxaan talo ahaan usoo jeedinayaa Dowlada Federaalka Soomaaliya in dhalinyaradaas Eriterea ay gaysay inta yar ee ka harsan gacmaheena kusoo sinto, inta meeshaas lagu dileyna magdhow ka bixiso shacabka Soomaaliyeedna ay cafis weydiisato maadaama ay caruudtooda iyadoon wargelin wadamo shisheeye ugu qaadey tababar ciidannimo.
Fadlan qoraalkan la wadaag walaalaha iyo waalidiinta ay ubadkooda iyo ehelkooduba ku maqanyihiin Eriterea iyo cidkasta oo ay quseyso howshaan oo awoodna u leh inuu wax ka qabto.
W/Q: Abdulahi Nur Colombo
