Warark laga helayo magaalada Khrtoum ee dalka Suudaan ayaa sheegay in ciidamada milateriga dalkaasi ay talada la wareegeen.
Ciidamo fara badan ayaa lagu arkay xarumaha waaweyn ee dowladda iyo wadooyinka magaalada Khartoum, waxayna ciidamadu la wareegeen xarunta Idaacadda iyo TV-ga dalkaasi, iyadoo Telefishanka dowladda Sudan uu ku dhawaaqay inay go’aan muhiim ah soo saari doonaan goor dhow.
Waxaa la xir-xiray mas’uuliyiin uu ka mid yahay madaxweyne ku xigeenkii dalkaasi, Guddoomiyah magaalada Khartoum, iyo mas’uuliyiin kale, waxaa kaloo ciidamadu joojiyeen in wax diyaarad ah ay ka duusho ama ku degto magaalada Khartoum.
Madaxweynihii dalkaasi Jen. Cumar Albashiir ayaa la sheegay inuu gurigiisa joogo oo halkaasi xabsi guri lagu geliyay, waxaana laga war sugayaa go’aanka ciidamada dalkaasi iyo cidda xukumi doonta dalkaasi.
