War hadda soo dhacay ayaa sheegaya in dowladda Mareykankan ay kulan degdega isugu yeertay Golaha Ammaanka Q/Midoobay.
Shirkan ayaa looga hadlayaa laba weerar oo maanta lagu qaaday maraakiib shidaalka qaada oo mareysay Badda Cumaan ee Khaliijka oo u dhaxeysa dalalka Imaaraadka iyo Cumaan, iyadoo waxyeelo weyn soo gaartay maraakiibtan, lagana daad gureeyay shaqaalihii la socday.
Golaha Ammaanka Q/Midoobay ayaa kulankooda uga doodi doona weerarrada lagu qaaday maraakiin dhowr ah oo mareysay Badda Khaliijka, iyadoo Ruushka uu ka digay in arrintan loo adeegsado falal ka dhan ah dalka Iiraan. Mareykanka ayaa olole ug jirta inuu weerarradaasi ku eedeyo dalka Iiraan.
Kulanka Golaha Ammaanka ee degdega ah ayaa noqon doona mid ay albaabada u xiran yihiin xilli ay sii kordheyso xiisadda ka taagan barriga dhexe, ayna sii kordheen weerarrada ka dhanka ah Maraakiibta shidaalka, taasoo keentay inuu sare u kacdo shidaalka dunida.
Markabka shidaalka qaada ee Front Altair ee laga leeyahay dalka Norway ayaa maanta lagu weeraray Gacanka Cumaan, waxaana la sheegay in saddex qarax laga maqlay markabka, balse aysan cidna ku dhaawacmin.
Markab kale oo lagu magacaabo Kokuka Courageous ayaa sidoo kale lagu weeraray isla aagga Badda Cumaan.
Dhinac kale, ciidamada badda Iran ayaa soo bad-baadiyey 44 qof oo ah shaqaalaha laba Markab oo saliidda qaada oo dab uu ka kacay kadib dhacdo ku qabsatay gacanka Cuman, sida ay sheegtay wakaaladda wararka Iran ee IRNA.
Mid ka mid ah maraakiibka oo sita calanka jaziiradda Marshall Islands ayaa kiimikada shidaalka lagu daro ee Ethanol kasoo qaaday dalka Qatar una socda Taiwan, waxaana saarnaa 23 shaqaale. Markabka kale oo ay saarnaayeen 21 shaqaale, ayaa sita calanka dalka Panama, wuxuuna kasoo tagay dalka Sacuudiga una socda Singapore.
