Waxaa xil ka qaadis degdeg lagu sameeyay Taliyihii Booliska Gobolka Banaadir, kadib markii uu ku dhawaaqay tallaabo ka dhan muddo kororsiga la filayo inuu sameeyo Baarlamaanka, kana hor yimid madaxweynaha xilkiisu dhammaaday ee Maxamed C/llaahi Farmaajo.
Warbaahinta Dowladda ayaa shaacisay in Taliyaha Ciidanka Booliska Soomaaliya Gen. Cabdi Xasan Maxamed Xijaar uu goor dhoweyd xilkii ka qaaday Taliyihii Booliska Gobolka Banaadir Saadaq Cumar Xasan (Saadaq John).
Waxaa xilka Taliyaha Booliska gobolka Banaadir loo magaacabay Gaashaanle Dhexe Farxaan Maxamed Aadan (Farxaan Qaroole) oo isla hadda loo dallacsiiyey Derejada Gaashaanle sare.
Siyaasiyiinta Mucaaradka ayaa ugu baaqay Farxaan Qaroole inuusan qaban xilka laga qaaday Saadaq Joon oo ay ku tilmaameen xil gumeed sida uu goor dhoweyd shaaciyay C/raxmaan C/shakuur Warsame.
Arrintan ayaa imaaneysa iyadoo Saadaq Joon uu ka hor yimid muddo kororsiha ka socda Baarlamaanka, waxayna bilow u tahay gadoodka ciidamada dowladda ee ka horjeeda qorshaha Farmaajo ku doonayo inuu xilka isaga sii joogo.
