Wafdi ka socda xukuumadda Somalia ayaa la sheegay inay ku xayirmeen Garoonka Diyaaradaha magaalada Muqdisho, kadib markii loo diiday inay tagaan magaalada Garowe.
Wafdigan oo ka koobana wasiiro iyo xildhibaanno ka soo jeeda Puntland ayaa diyaaradii qaadi lahayd loo diiday fasax ay ku degto garoonka diyaaradaha Gen. Maxamed Abshir ee magaalada Garowe.
Mas’uuliyiinta dowladda ee maanta doonayey inay tagaan magaalada Garowe ayaa waxaa ka mid ahaa Wasiirka Arrimaha Dibadda Axmed Ciise Cawad, Wasiirka Qorsheynta Jamaal Xasan Maxamed, Wasiiru dowlaha Maaliyadda Maxamuud Xayir iyo Mas’uuliyiin kale oo ay ku jiraan xildhibaanno la socday wafdiga oo dhammaantood ka soo jeeda Puntland.
Maamulka madaxweynaha xilligiisa dhammaanayo ee Puntland C/weli Gaas ayaa amar ku bixiyey inaysan degaanad Puntland imaan karin wasiirada xukuumadda Somalia iyo mas’uuliyiinta ka tirsan xafiisyada madaxtooyada iyo Ra’iisal wasaaraha inta ay socoto doorashada Puntland.
Wafdiga maanta u kicitimi lahaa magaalada Garowe ayaa muddo sugayey fasax la siiyo diyaaradooda, waxaana magaalada Garowe dadaal ka waday isimo iyo xubno uu hormuud u yahay Senator C/raxmaan Faroole, taasoo la isku mari waayey, iyadoo uu diidmo cad ka hor keenay madaxweyne Gaas.
