Wararkii ugu danbeeyay ee howgalka xaaladda wiilka yar ee reer Marooko Rayaan ayaa sheegaya in hadda kooxda gurmadka ay soo saareen wiilkaasi oo mudo shan maalmood ah ku jiray ceel uu ku dhacay oo gaaraya 32 Mitir.
Waxaa goor dhoweyd ay kooxda badbaadiyeyaasha gaareen halkii uu ku sugnaa wiilka Rayan, waxaana halkaasi xilligii ugu danbeeyay arrintiisa la wareegay kooxda dhaqaatiirta badbaadiyeyaasha ah oo gurmadii ugu horeeyay u fidiyey.
Aabaha iyo hooyada dhalay Wiilka yar ee Rayaan ayaa la geeyay iridka godka weyn ee howlgalku ka socday, waxayna noqdeen dadkii ugu horeeyay ee arka wiilkooda oo shan maalmood ka maqnaa.
Rayaan ayaa Talaadadii ku dhacay ceelka tuulada Tamrout, ee gobolka Chefchaouen, Waqooyiga Morocco, isagoo shan maalmood ku jiray halkaasi; Waxaana howsha gaabiyey iyadoo kooxda gurmadka oo si tartiib ah u qodeysa godka uu ka hor yimid dhagax adag.
Howlgal socday muddo 24 saacadood ah oo godka si dhinac ah oo tartiib ah loo qodayay ayaa ugu danbeyn kooxda badbaadiyeyaasha ay gareen halka uu ku dhacay Rayaan oo ahayd salka Ceel 32 Mitir qodan oo aan hadda shaqeyn.
Xaaladda wiilka yar ee 5 sano jirka ah ayaa dunida oo dhan lagala socday, kadib markii arrintiisu noqotay mid caalam iah, waxaan duco u diray malaayiin muslsmiin ah, kadib markii uu ceelka oo aad u yar dartiis ay socon weyday dadaallo lagu doonayay in looga soo saaro Ceelka.
