Dekadda Muqdisho ayaa maanta dib u shaqo bilwoday kadib 8 maalmood oo hakad ay geliyeen ganacstada magaalada Muqdisho.
Ganacsatada wax kala soo dega dekadda Muqdisho ayaa diiday canshuur ay kordhisay Wasaaradda Maaliyadda oo ah tan laga qaado bagaashka iyo alaabaha aan daruuriga ahayn ee kasoo dega dekadda Muqdisho, kuwaasoo markii hore loo canshuuri jiray qaab loo qiyaaso weyn iyo yaraan.
Kulan adag oo shalay dhex maray qaar ka mida ganacsatada iyo madaxda xukuumadda Soomaaliya arrintan u qaabilsan sida Ra’iisal wasaaraha, wasiirada Maaliyada iyo Ganacsiga ayaan wax horumar laga gaarin, iyadoo ganacsatada laga sugayey codsi ay u jeedisay xukuumadda oo ah in shaqada dekadda ay bilaabaan.
Qaar ka mida ganacsatada Muqdisho ayaa u hoggaansamay canshuurta dowladda soo rogtay iyadoo saaka bixiyey, isla markaana dekadda ay dib u shaqo bilowday, halka ganacstada kale ay weli go’aankooda ku taagan yihiin.
Wararka ayaa sheegaya in kulankii lagu kala tegay ee shalay dhex maray ganacsatada Muqdisho iyo Ra’iisal wasaare Kheyre, kadib uu dhacay kulan kale oo dhex maray ganacatada qaarkood iyo Ra’iisal wasaaraha, taasoo keentay inay kala jabaan ganacsatada oo qeyb ka mida ay ogolaadeen bixinta canshuurta cusub.
Dooda ugu weyn ee ganacstada G/banaadir qaar ka mida qabaan ayaa ah in Kartoonka Bagaashka ah lagu canshuuro Dakadda Muqdisho lacag dhan $16.5, halka Dekadda Magaalada Boosaaso Kartoonka Bagaashka in lagu canshuuro lacag dhan 0.8 oo ka yar hal doolar.
