Diyaargarow weyn ayaa ka socda xarunta maamulka Galmudug ee Dhuusamareeb oo Berri uu ka furmi doono shir u gaara madaxda Maamul Goboleedyada dalka.
Ciidamo badan ayaa la dhigay, iyadoo uu ka dhaqan galay bandow aan la geli karin, waxaana gaaray afar ka mida Gawaarida aanay rasaastu karin oo la sheegay in loogu talogalay madaxda tegeysa magaalada maanta iyo Berri.
Ciidamada ilaalada madaxweynayaasha Puntland iyo Jubbalan ayaa la filayaa inay maanta gaaraan magaalada Dhuusamareeb iyadoo sidoo kale ay ciidamo culus la socon doonaan Siciid C/llaahi Deni iyo Axmed Maxamed Islaam (Madoobe).
Madaxweynaha Puntland ayaa ku sugan magaalada Gaalkacyo, waxaana la sheegay in ciidamado fara badan uu la tegi doono magaalada Dhuusamareeb, halka Axmed Madoobe ay ilaaladisa laba jeer kala tegi doonaan caasimadda Galmudug.
Madaxda Puntland ayaa magaalada Muqdisho la imaan jiray horin ciidan oo ilaalo u ah, iyadoo madaxweyne Axmed Madoobe uu isna xilliyadii danbe magaalooyinka uu tago ay la socdaan ciidamo ilaalo u ah.
