Kulan ka dhacay Madaxtooyada Soomaaliya ayaa la isugu keenay Guddoonka labada Aqal ee Baarlamaanka Soomaaliya, iyadoo ujeedkiisu ahaa heshiisiinta labada dhinac si ay wadajir ugu ansixiyaan Heshiiska Doorashad Dalka.
Kulanka waxaa ka qeyb galay Madaxwayne Maxamed Cabdullaahi Farmaajo, Madaxda Dowlad-Goboleedyada, Guddoonka Labada Aqal ee Baarlamaanka Federaalka Soomaaliya, waxaama Madaxtoyada ay shaacisay inlooga hadlay muhiimadda ay leedahay in la sii ambaqaado qodobbadii ka soo baxay Shirkii Muqdisho ee Wadatashiga Doorashooyinka iyo dhammeystirka Heshiiskii Samareeb 3.
“Kulanka ayaa ku qotamay sii ambaqaadidda qodobadii Warmurtiyeedkii 17-kii bishan ay wadajirka u soo saareen Madaxwaynaha JFS, Madaxda Dowlad Goboleedyada iyo Maamulka Gobolka Banaadir, kaas oo qodobkiisa 11-aad uu qeexayey in Heshiiskan siyaasadeed loo gudbindoono Baarlamaanka Federaalka si ay u meel mariyaan.” ayaa lagu yiri Qoraalka Madaxtooyada.
Madaxweyne Maxamed Cabdullaahi Farmaajo oo hore meesha uga saaray doorkii Aqalka Sare ayaa hadda waxaa doorkiisii qaatay madaxda Dowlad goboleedyada oo isu keenay laba guddoon.
