Wararkii ugu danbeeyay ee magaalada Muqdisho ayaa sheegaya inuu dhaqdhaqaaq ciidan ka jiro xarunta weyn ee Hay’adda Nabadsugidda iyo Sirdoonka ee NISA ee loo yaqaan ‘Habar Khadiijo’ ee degmada Shibis.
Arrintan ayaa salka ku heysa xiisadda siyaasadeed ee ka dhex aloosan Madaxweynaha muddo xileedkiisu dhammaaday ee Maxamed C/llaahi Farmaajo iyo Ra’iisal wasaare Maxamed Xuseen Rooble, kana dhalatay kiiska Ikraan Tahliil Faarax oo ka tirsaneyd Hay’adda NISA.
Ciidamada NISA hoostaga ee gaarka ah ayaa lagu arkay wadooyinka laga galo Xarunta NISA, iyadoo ay maanta ku beegan tahay waqtiga uu Ra’iisal wasaare Rooble u qabtay inuu xilka wareejiyo Agaasimihii hore ee NISA Fahad Yaasiin.
Farmaajo ayaa ogolaaday xil ka qaadista Fahad Yaasiin, laakiin wuxuu diiday inuu xilkaasi qabto Jeneraalka uu magacaabay Ra’iisal wasaaraha ee Bashiir Maxamed Jaamac, isagoo sarkaalkii G/Banaadir ee NISA dhinaciisa u magacaabay xilka agaasimaha NISA.
Hay’adda NISA ayaa goor dhoweyd shaacisay inay Taliska Nabad Sugida & Sirdoonka Qaranka ay ka dhacday munaasibad uu xilka kula wareegay Taliyaha cusub ee Ku-meel-gaarka ah ee HSNQ, Gaashaanle Sare Yaasiin Cabdullaahi Maxamuud.
Waxaa laga cabsi qabaa in khilaafka isu bedelo gacan ka hadal oo awood la isu adeegsado, xilli la filayay inuu xilka la wareego Jen. Bashiir Maxamed Jaamac xilli uu weli dalka maqan yahay agaasimihii xilka laga qaaday ee Fahad Yaasiin.
Rooble ayaa ku adkeysanaya inuu xilka Hay’adda NISA la wareego agaasimaha uu magacaabay, waxayna xaaladda cirka isku shareeray, kadib markii uu ku eedeeyay Farmaajo inuu ka horjeedo cadaalad ay hesho Ikraan Tahliil Faarax iyo inuu daba taagan yahay awoodii uu wareejiyay.
Wararkii ugu danbeeyay ayaa sheegaya in ciidamada raasan NISA ay ku kala qeybsameen arrinta hoggaanka, Ciidamada Duufaan oo u badan maleeshiyadii Shabaabka kasoo soo goosatay ayaa taageersan Farmaajo, halka Cutubyada Warran iyo Gaashaan ay taageersan yihiin Ra’iisal wasaare Rooble.
