Bethuel Kiplagat wuxuu qayb muhiim ah ka soo qaatay wadahadallo nabadeed oo qaar ka mid ah dalalka gobolka lagu heshiisiinayey.
Wuxuu Kenya ugu xil saarnaa hanaankii nabadda ee Soomaaliya ee socday 2003 – 2005 iyo Shirkii dib u heshiisiinta ugu waqtiga dheeraa ee Soomaalida loo qabtay, kaasoo markii danbe lagu dhisay dowladii uu madaxweynaha ka noqday madaxweyne C/llaahi Yuusuf Axmed.
Wuxuu kaloo ahaa guddoomiyaha guddiga farsamada IGAD u qaabilsanaa shirka dib u heshiisiinta Soomaalida. Wuxuu ahaa diblomaasi Soomaalida dhexdeeda caan ka ah oo ku soo dhex jiray siyaasiyiinta iyo beelaha Soomaalida muddo sanado ah.
Danjire Kiplagat wuxuu door muhiim ah ka cayaaray wada xaajoodyadii nabadda ee dhex maray madaxweynaha Sudan Cumar Al Bashiir iyo hogaamiyihii fallaagada John Garang.
2009 – 2010 wuxuu noqday guddoomiyaha guddiga runta, cadaaladda iyo dib u heshiisiinta ee Kenya, xilkaas oo uu iska casilay markii lagu sameeyey baaritaanno ku lug leh eedeymo la xiriira tacaddiyo xuquuqda aadanaha ah, gaar ahaan kaalin inuu ku lahaa xasuuqii Wagalla ee 1984, kaasoo boqollaal qof lagu dilay markii milateriga oo ugaarsanaya miliishiyo la oran jiray Shifta ay hawlgal ka sameeyeen waqooyiga Kenya.
Bethuel Kiplagat wuxuu dhintay isagoo 81 jir ah.
