Faahfaahin dheeraad ah ayaa kasoo baxeysa dagaal culus oo saaka ay Maleeshiyada Alshabaab ku weerarreen degaanada Yasooman iyo Beera-yabaal ee degmada Buuloburte iyadoo dagaalku dhaliyey qasaare xoog leh.
Wararkii ugu danbeeyay ayaa sheegay in Alshabaab oo dagaalamayaan aad u badan ku weerarray labada degaan loo adeegsaday Diyaaradaha dagaalka ee Drone-ka markii ay culeys weyn saareen ciidamada dowladda iyo kuwa degaanka.
Saraakiisha ciidamada dowladda ee aaggaasi ka dagaalamaya ayaa laga soo xigtay in Alshabaab badan ay ku dhinteen duqeynta Diyaaradaha, kadib markii ay ciidamada dowladda dalbadeen taakuleyn dhinac cirka ah.
Sidoo kale ciidamo gurmad ah ayaa gaaray degaanka Yasooman, waxaana hoggaaminaya Guddoomiyaha Gobolka Hiiraan Cali Jeyte Cusmaan.
Qasaaraha labada dhinac kala gaaray ayaan weli kala caddeyn, iyadoo guulo la kala sheegtay, isla markaana dhinaca dowladda lagu shaaciyey in dagaalka lagu dilay 20 Alshabaab ah, halka Alshabaab ay sheegatay inay dishay ku dhowaad 120 askari.
