Wafdiyo kala duwan ayaa ku sii jeeda magaalooyinka Galmudug, kadib markii isbedel weyn uu ka dhacay halkaasi 24-kii saac ee ugu danbeysay markii madaxweyne Axmed Ducaale Xaaf uu ka guuray magaalada Dhuusamareeb, isla markaana ku dhawaaqay inuu burburay heshiiskii uu la galay Ahlu suna.
Ra’iisal wasaaraha Xukuumadda Soomaaliya Xasan Cali Kheyre ayaa ku sii jeeda magaalada Dhuusamareeb, iyadoo safarkan uu ahaa mid hore loo qorsheeyay oo wasiirka arrimaha gudaha uu diyaariyey, waxaana la sheegay inuu qeyb ka yahay heshiis ay dowlada Federaalka la gashay maamulka Ahlu suna oo keenay inuu madaxweyne Xaaf ka laabto heshiiskii uu kula jiray kooxdaasi.
Diyaargarowga soo dhoweynta Ra’iisal wasaare Kheyre ayaa ka socota magaalada Dhuusamareeb, waxaana hore halkaasi ugu sugnaa ciidamada ilaalada Ra’iisal wasaaraha oo halkaasi la geeyay iyo wafdiga wasiirka Arrimaha gudaha Cabdi Maxamed Sabriye.
Dhinaca kale guddoomiye ku xigeenka Aqalka Sare Abshir Bukhari iyo xubno la socda ayaa ku sii jeeda magaalada Cadaado, waxaana socdaalka wafdigan uu soo baxay saacadihii ugu danbeeyay kadib markii madaxweyne Xaaf ku dhawaaqay inuu diyaar u yahay doorasho, balse uu sheegay inay ka dhaceyso magaalada Cadaado.
Xaaladda maamulka Galmudug ee khilaafku la degay ayaa weji cusub gashay, waxaana socda ololeyaal iska horjeeda oo ku saabsan Doorashada Galmudug oo xukuumadda Soomaaliya ay sheegtay inay July 4 ka dhaceyso magaalada Dhuusamareeb, laakiin waxaa muuqata in dooroshadaasi ka hor ay shaqo badan harsan tahay oo aanay suuragal noqon doonin inay ku dhacdo muddo 10 maalmood gudahood ah.
Madaxweyne Xaaf ayaa weli ku sugan degaanka Godinlabe, waxaana hore loo filayey inuu u socdaalo magaalada Gaalkacyo, iyadoo warar kale sheegayaan inuu doonayo inuu tago magaalada Cadaado.
