Madaxweynaha Mareykanka ee mudadda xil heyntiisa sii dhammaaneyso ayaa wada dadaalkii ugu danbeeyay ee uu doonayo inuu ku heshiisiiyo dowladaha Qatar iyo Sacuudiga..
La-taliyaha Trump oo ah wiilka uu soddoga u yahay Jared Kushner ayaa isaga dab qaadaya madaxda Sacuudiga iyo dalka Qatar, waxaana arrinta qeyb ka ah dowladda Kuwait oo hore dhexdhexaadin uga dhex waday dalalka Khaliijka iyo Qatar.
Warkii ugu horeeyay ee in loo dhow yahay ku dhawaaqista heshiis dhex maray Sacuudiga iyo Qatar waxaa shaaciyey wasiirka arrimaha dibadda Qatar Ahmed Nassir A-sabah oo sheegay in wadahadallo mira-dhal ah ay dhaceen toddobadyadii ugu danbeeyay arrintuna meel fiican soo gaartay.
Wasiirka Arrimah dibadda Sacuudiga Faisal bin Farhan ayaa dhinaciisa sheegay in maalmihii ugu danbeeyay guul lag gaaray wadahadallada lagu xalinayo xiisadda ka dhex taagan dalalka Sacuudiga iyo Qatar.
Dalalka Sacuudiga, Imaaraadka, Baxreyn iyo Masar ayaa 5 June 2018 xayiraad dhul Bad iyo cir ah kusoo rogay dalka yar ee Qatar, waxayna ku eedeeyeen inuu taageero argagixisada, taasoo lagu go’doomiyey dalkaasi, waxaana tallaabadaas ay ku sigatay inay dalalkaasi u duulaan dalka Qatar.
Madaxweynaha Mareykanka ayaa taageero u muujiyey go’doominta dalka Qatar, waxaana dhinaca kal u gurmaday dalka Turkigao oo ciidamo u diray, halka Iiraan ay u furtay hawadeeda, waxaana hadda Trump uu doonayaa inuu guul siyaasadeed ka dhigto heshiisiinta dalalka Khaliijka inta aanu xilka ka degin 20-ka Janaayo 2021.
