Wararka laga helayo magaalada Dhuusamareeb ee xarunta maamulka Galmudug ayaa sheegaya inay ka socdaan kulamo iska horjeeda oo ku saabsan maamul u sameynta Galmudug oo ay ku loolamayaan dowladda Federaalka iyo Ahlu suna.
Waxaa magaalada kulamo kala duwan shalay iyo xalay ku yeeshay Guddiyada Doorashada iyo maamul u sameynta Galmudug ee ay kala magacaabeen dowladda Federaalka oo taageero ka heysata Madxaweynaha Galmudug iyo Ahlu suna oo gadaal ka riixeysa Madaxa xukuumadda Galmudug, waxaana labada dhinac ay u jiraan tartan siyaasadeed culus.
Waxaa shalay magaalad Dhuusamareeb gaarya Guddiga ay magacaawday dowladda Soomaaliya, iyadoo loo yeeray odayaasha beelaha Galmudug, waxayna xukuumadda wadaa qorshe ay ku dedejineyso dhismaha maamulka Galmudug oo waqti dheer soo jiitamay, iyadoo uu magaalada ku sugan yahay Wasiirka Arrimaha gudaha Xukuumadda Soomaaliya Cabdi Maxamed Sabriye.
Dhinaca kale Ahu suna ayaa qorshaheeda hore yahay inay qaab siyaasadeed u dagaalanto si ay qeyb fiican uga hesho dhismaha maamulka Galmudug, iyadoo hore faa’iido dhaqaale iyo xilal uga heshay khilaafaadkii ay la gashay dowladda Federaalka, laakiin waxaa markan muuqata inay tahay tallaabadii ugu danbeysay ee Ahlu suna ku dooneyso inay lug weyn ku yeelato maamulka cusub ee Galmudug.
Waxaa maanta magaalada Dhuusamareeb ka dhacaya kulan lagu taageerayo Guddiga farsamada iyo maamul u sameynta Galmudug ee uu magacaabay Sheekh Maxamed Shaakir, wuxuuna kukankii uu shalay la yeeshay xubnaha guddiga ka sheegay in soo xuli doonaan xildhibaanada Baarlamaanka cusub ee Galmudug, ayna ku yimaadeen si dastuuri ah.
Ahlu suna oo hore u dooneysaay inay soo magacawdo 30 xildhibaan oo ka mida xildhibaannada Galmudug ayaa hadda raadinaya kala bar tiradaasi, lamana oga in khilaafka labada dhinac iyo guddiyada is barbar socda laga heshiin doono iyo dowladda Soomaaliya ay iska wadan doonto howsheeda.
