Wararka laga helayo magaalada Dhuusamareeb ee xarunta Maamulka Galmudug ayaa sheegaya inay halkaas maanta gaareen ciidamo gurmad ah oo ay u dirtay dowladda Federaalka.
Cutubyo ka tirsan ciidamada Gorgor ee Milatariga sida gaarka ah u tababarran ayaa maanta la geeyay magaalada Dhuusamareeb, waxaana saddex duulimaad ay halkaasi geeyeen ciidamo ku dhow 200 askari.
Ciidamadan ayaa ku biiraya xoogag ay abaabuleyso Galmudug si ay uga hortagaan maleeshiyo ay Ahlu suna dib uga abaabuleyso Gobolka Galgaduud, iyadoo shalay uu dagaal ku dhex maray labada dhinac degaanka Bohol ee duleedka magaalada Dhuusamareeb, iyadoo ay dib u qabsadeen Ahlu Suna.
Wararka ayaa sheegaya in maamulka Galmudug uu diyaarinayo ciidamo xoog leh oo maquuniya maleeshiyada Ahlu Suna ee dib loo abaabulay, ujeedkuna yahay in gacanta lagu soo dhigo madaxda Ahlu Suna ee dhowaan gaaray degaanka Huurshe.
Dhinaca kale madaxweynaha Galmudug, Xildhibaanno iyo siyaasiyiin kasoo jeeda Galmudug ayaa kusii jeeda magaalada Dhuusamareeb, iyadoo ay socdaan dadaallo siyaasadeed iyo kuwa milateri oo ka dhan ah Ahlu Suna.
