Dowladda Kenya ayaa jawaab kulul ka bixisay eedeyn ay u jeedisay dowladda Soomaaliya oo ku saabsan faragelin ay ku heyso qaranimada iyo madax bannaanida Soomaaliya.
Qoraal ka soo baxay Wasaarada Arrimaha Dibbada dowlada Kenya oo si adag loo qoray ayaa lagu beeniyay warkii kasoo yeeray dowladda Soomaaliya ee uu Golaha Amniga ka jeediyey Safiirka Somalia ee Q/Midoobay, kaasoo Kenya ku eedeeyya inay faragelin ku hayso arrimaha gudaha iyo madax bannaannida Soomaaliya.
Dowlada Kenya ayaa qoraalkeeda ku sheegtay inay been abuur yihiin eedaha dowladda Soomaaliya, laguna doonayo in indha looga weeciyo horumar la’aanta ka jirta siyaasada dalka Soomaaliya, waxayna marmarsiiyo u soo qaaday dagaalka lagula jiro Alshabaab oo halis ku ah Somalia yo Kenya.
“Kenya waxay diidan tahay eedeynta aan sal iyo baarka lahayn ee uga timid Dowladda Federaalka Soomaaliya, Kenya waxay leedahaya dhaqan nabadeed oo soo jireen ah, waxayna dhinacyada Soomaalida iyo Beesha Caalamka kala shaqeysaa Amniga, iyadoo qiime sare ku bixisay welina ku bixineysa nabadda Soomaaliya iyo Gobolka…” ayaa lagu yiri qoraalka Wasaaradda Arrimaha Dibadda ee Kenya.
Qoraalka Kenya waxaa lagu soo xigtay oo looga jawaabay hadalkii uu Golaha amniga ka jeediyey Danjiraha Soomaaliya ee Qaramada Midoobay Abuukar Daahir Cismaan (Baalle), qoraal kas oo baxay Wasaaradda Arrimaha dibadda iyo wareysi uu bixiyay mas’uul ka tirsan dowladda Soomaaliya.
Jawaabta Kenya ayaa waxaa ka muuqatay inay aad uga careysan tahay in dowladda Soomaaliya ay dacwad cusub gaarsiiso Golaha Amniga, waxaana lagu soo gabagabeeyay in dowladda Kenya inay tahay dal jaal la ah Soomaaliya oo kala shaqeynaya si nabad waarta uga dhalato Soomaaliya.
HOOS KA AKHRISO QORAALKA
