Dowladda Qatar ayaa ugu baaqday dhinacyada iyo kooxaha siyaasadda ee Soomaaliya inay meel iska dhigaan khilaafaadka u dhaxeeya, una midoobaan sidii wadajir loogu gaari lahaa heshiis siyaasadeed iyo dib u heshiisiin si loo xoojiyo xuquuqda Insaanka, loona helo xuquuqda asaasiga ah.
Waxay kaloo dowladda Qatar ugu baaqday beesha caalamka ee arrimaha Soomaaliya ku howlan inay mideeyaan dadaalkooda iyo taageerada ay siiyaan Soomaaliya, ayna xoogga saaraan kaalmada bani’aadamnimo iyo jawaab laga bixiyo xaaladaha degdega ah.
Qoraal uu soo saaray Mas’uul ka tirsan Wasaaradda Arrimaha dibadda dalka Qatar oo qaabilsan xuquuqda insaanka Dr. Turki Aala maxmuud ayuu kusoo dhoweeyay warbixinta xaaladda Xuquuqda insaanka Soomaaliya ee uu jeediyey khabiirka Madaxda bannaan ee Q/Midoobay Bahame Tom Nyanduga, wuxuuna sheegay iyadoo Soomaaliya ay mareyso xaalad adag inay haddana horumar ka sameysay dhinacyo kala duwan oo lagu bogaadin karo.
Ka sokow in dowladda Qatar ay ugu baaqday kooxaha siyaasadda iyo dhinacyada isku haya siyaasadda Soomaaliya inay yeesheen midnimo, ayna wadajir uga shaqeeyaan hanaan siyaasadeed oo xasiloon, waxay shaacisay inay marti gelineyso shir ku saabsan Arrimaha Soomaaliya oo wasiirada arrimaha dibadda ururka Iskaashiga Islaamka ay ku yeelan doonaan magaalada Doha 27-ka Oktoobar.
Dr. Turki Aala Maxmuud wuxuu sheegay in dowladda Qatar ay si buuxda u taageersan tahay qaranimada iyo madax bannaanida Soomaaliya dhuleed ee Soomaaliya, ayna ku garab taagan tahay dowladda Federaalka sidii Soomaaliya ay uga gudbi lahayd xaaladda adag.
