Dowladda Qatar ayaa noqotay dowladii labaad ee ka jawaabta codsigii dowlada Soomaaliya ee gurmadka dadka ku waxyeeloobay qaraxii Muqdisho.
Ra’iisul wasaare ku xigeenka Soomaaliya Mahdi Maxamed Guuleed (Khader) ayaa sheegay in Dowlada Qatar ay diyaar u tahay inay Muqdisho u soo dirto Diyaarad gurmad ah oo lagu qaado dadka ku dhaawacmay Qaraxii Sabtidii ka dhacay Magaalada Muqdisho.
Mahdi Maxamed Guuleed ayaa sheegay in qorshaha uu ahaa in dowlada Qatar ay maanta soo dirto diyaarada Gurmadka ah balse ay iyaga dib u dhigeen maadaama maanta Diyaarad ay soo dirtay Dowlada Turkiga lagu daabulay dhaawacyada ugu daran.
34-ruux oo ka mid ah dadka qaba dhaawacyada ugu daran ayaa maanta loo qaaday dalka Turkiga si halkaasi loogu soo daweeyo, waxaana arintaasi ay qeyb ka tahay dadaalada dowlada Turkiga ay ku garab taagan shacabka Soomaaliyeed, iyadoo Wasiirka Caafimaadka Turkiga uu saaka soo gaaray magaalada Muqdisho, wuxuuna u kuur gali doonaa xaalada dadkii waxyeelada ka soo gaartay qaraxii ka dhacay Isgoyska Soobe ee magaalada Muqdisho.
