Wasaaradda Arrimaha Dibadda dowladda Soomaaliya ka dalbatay dowladda Kenya inay si degdeg ah u joojiyo xadgudubyada ka dhanka ah madax bannaanida Soomaaliya.
Qoraal ka soo baxay wasaarada Arrimaha dibadda Soomaaliya ayaa lagu yiri: “Dowladda Federaalka Soomaaliya waxa ay ugu yeeraysaa Dowladda Kenya in ay si degdeg ah u joojiso xadgudubyada ka dhanka ah madaxbannaanida Soomaaliya iyo falalka xasillooni darrada ah ee ay ka waddo xuduudda labada dal”, waxayna dowladda Soomaaliya sheegtay inay inay in muddo ah dulqaad muujineysay.
“Xukuumadda Federaalka Soomaaliya oo muddo badan ka dhur-sugaysay in hoggaanka dalka Kenya ay garowsadaan muhiimadda xiriirka taariikhiga ah ee labada dal iyo iskaashiga dhaqan-dhaqaale, amni iyo siyaasad ee ka dhexeeya labada shacab iyo labada dowladood, ayaa waxaa ka go’an in ay qaaddo tallaabo kasta oo diblumaasiyadeed oo ay ku gudaneyso waajibaadkeeda dastuuriga ah ee la xiriira ilaalinta midnimada iyo madaxbannaanida Jamhuuriyadda” ayaa ka mid ahaa qoraalka caawa kasoo baxay Wasaaradda Arrimaha dibadda Soomaaliya.
Qoraalka Wasaaradda Arrimaha Dibadda Somalia ayaa lagu sheegay in Soomaaliya ay qadarineyso AMISOM balse aysan ka oggolaaneynin inay howlahooda “dhan kale u weeciyaan”.
War-saxaafadeedka waxaa lagu soo gabagabeeyay: “Dowladda Federaalka Soomaaliya ayaa xusuusinaysa dhiggeeda dalka Kenya daris wanaagga iyo ilaalinta xasilloonida gobolka, inkastoo hab-dhaqanka cusub ee Dowladda Kenya uu kasoo horjeedo qarannimada Soomaaliya, curfiga caalamiga, mabaadi’da Ururka Midowga Afrika, heshiisyada labo geesoodka iyo nabadgalyada guud ee Gobolka”.
