Xiisad ku saabsan maamulka degmada Baardheere ayaa ka taagan magaaladaasi, iyadoo ay isku hayaan xubno cusub oo ay soo magacawday Jubbaland iyo maamulkii hore oo taageersan dowladda Federaalka.
Xiisadda ka taagan magaalada ayaa bilaabatay markii uu Baardheere tegay Guddoomiyaha cusub ee Jubbaland u soo magacawday Baardheere Ismaaciil Cabdi Qodax, isagoo taageero ka heysta guddoomiye ku xigeenka Gobolka Gedo ee raacsan Maamulka Jubbaland Sheekh Maxamed Xuseen Al-qaadi.
Waxaa magaalada Baardheere ku wada sugan ciidamo kala taabacsan dowladda Federaalka oo taageero ka heysata Itoobiyaanka iyo ciidamo taabacsan maamulka Jubbaland ee Axmed Madoobe, waxaana la sheegay in ciidamada dowladda ay raadinayaan guddoomiye ku xigeenka Gedo Sheekh Alqaadi oo ay doonayaan inay xiraan.
Guddoomiyihii hore ee degmada Baardheere oo ku sugan magaalada Muqdisho C/llaahi Nuur Xasan ayaa ku doodaya inuu weli yahay Guddoomiyaha Baardheere, iyadoo aanay waxba ka jirin magacaabidda cusub ee Jubbaland, wuxuuna caddeeyay in dowladda Soomaaliya ay amar ku bixisay in lasoo xiro Guddoomiye ku xigeenka Gedo Sheekh Maxamed Alqaadi.
Loolanka ka dhaxeeya Dowladda Federaalka iyo Maamulka Axmed Madoobe ayaa hore uga dhacay degmooyinka Beledxaawo iyo Luuq, iyadoo uu hadda saameyn ku yeeshay Degmada Baardheere.
