Dowladda Soomaaliya ayaa si kulul markeedii ugu horeysay uga hadashay arrinta derbiga Kenya dhismihiisa ka bilowday xuduudka Kenya tan iyo markii iska hor imaad ka dhacay degmada Beledxaawo ee Gobolka Gedo halkaasoo Kenya damacday inay burburiso guryaha Soomaalida si ay derbigaasi u dhex mariso.
Wasiirka Amniga Soomaaliya C/risaaq Cumar Maxamed oo warbaahinta la Muqdisho ayaa sheegay inaanu jirin dal ku soo xadgudbi kara xuduuda Soomaaliya hal taako oo ka mid ah, isla markaana dowladda Soomaaliya ay derbigaasi u aragto mid aan keeneynin wax ammaan ah oo Kenya ay hesho.
“Xukuumadda Soomaliya waxay aaminsan tahay in dal jaar nala ah kusoo xadgudbi karin xuduudka wadanka; hal taako uma ogolaanayno in lagu soo xadgudubo” Ayuu yiri Wasiirka oo intaas ku daray in dhismaha derbiga ay Kenya wado aanu waxba ka tari doonin suggida amniga, isla markaana abuuri doono dhibaato weyn oo dadka labada dhinac ku nool soo gaarta.
Madaxweyne Xasan Sheekh ayaa dhowaan la kulmay madaxweynaha Kenya Uhuru Kenyatta xilli uu transit ku ahaa Nairobi, waxaa kaloo Kenya tegay wafdi uu hogaaminayo Ra’iisal wasaare Cumar C/rashiid mana muuqato heshiis arrintaasi laga gaaray ama ugu yaraan war cad oo Dowladda Soomaaliya ka soo baxay marka laga reebo haddalo diblomaasiyadeed oo aan kala caddeyn xilli dowladda Kenya ay qorshaheeda wadato isla markaana dadka ku nool degmooyinka xuduudka siiba gobolka Gedo ay qeylo dhaan u soo direen dowlada Federaalka.
Goobjooge.com
[ad name=”HTML-1″]
[ad name=”HTML-6″]
