Odayaasha dhaqanka Gobolka Hiiraan ayaa ku kala qeybsamay arrinta maamul u sameynta Gobolka Hiiraan kadib kulan xasaasi ah oo ay shalay la yeesheen Ergeyga Qaramada Midoobay Micheal Keating iyo wafdi ka socday UN-ka oo shalay tegay magaalada Beledweyne.
Odayaasha dhaqanka Hiiraan oo ka koobnaa 8 Duub, ahaana kuwii dhowaan qaadacay ka qeyb galka shirka Jowhar ayaa farqi weyn soo kala dhex galay intii uu socday kulankii ay la lahaayeen Micheal Keating, waxaana shirka dhexdiisa ay kala qaateen laba aragti oo kala duwan, kadib markii la weydiiyay sida ay rabaan in loo dhiso maamulka Hiiraan iyo Shabeelaha Dhexe.
Ugaasyada Beesha Xawaadle Ugaas Xasan Ugaas Khaliif ayaa sheegay inay doonayaan in marka hore dib u heshiisiin loo sameeyo beelaha Gobolka Hiiraan, isla markaana gobolka Hiiraan laga dhigo laba gobol, kadibna la guda galo maamul ay yeeshaan labada gobol ee Hiiraan. Arrintan waxaa ku waafaqay duubabka beelaha Makane iyo Bajamal.
Dhinaca kale waxaa fikrad kale oo taas khilaafsan goobta ka sheegay Duubabka beelaha Gaaljecel, Jajeele, Baadicade iyo Jidle oo iyagu si cad u sheegay inay iyagu taageersan yihiin maamul loo dhiso Goboladda Hiiraan iyo Shabeelaha Dhexe, balse ay ka cabanayaan qaabka dowladda Federaalka shirkaasi u maamushay, waxayna caddeyeen inay doonayaan in maamulka shirka lagu soo celiyo gacanta odayaasha labada gobol.
Arrintan ayaa soo shaac bixisay in odayaasha reer Hiiraan ay kala wataan ajendayaal kala duwan oo aanay jirin wax ay dhexdooda isku waafaqsan yihiin. Wafdiga Q/Midoobay ayaa dib uga soo laabtay kulankaasi, waxaana lagu wadaa inay Beledweyne tagaan xubno ka socda urur Goboleedka IGAD.
Wadani.com
