Faahfaahin ayaa laga helayaa qarax Miino oo maanta ka dhacay Aargada degmada Deyniile ee Gobolka Banaadir, kaasoo dhaliyey qasaare kala duwan.
Qaraxa oo ahaa Miinada dhulka lagu Aaso lala beegsaday Gaari Land Cruiz (Cabdibille) ah oo ay wateen ciidamada Milateriga dowladda oo xilligaas marayey halka loo yaqaan Ceelka Ifis.
Wararka ayaa sheegaya inuu qaraxu dhaliyey dhimasho iyo dhaawac. 3 qof ayaa ku dhintay qaraxa, halka 6 qof oo kale ay ku dhaawacmeen oo 3 ka mida ay askar yihiin, waxaana rasaas furay qaraxa kadib ciidamadii la beegsaday ee la socday Gaariga.
Dadka ku dhaawacmay ayaa waxaa ka mid ahaa Dad shacab ah oo watay Gaari yar iyo qaar wadadda marayey, waxaana Miinada oo ahayd nooca Soo-boodada loo yaqaan ay ahayd mid xoog leh oo jugta laga maqlay deagaano badan oo caasimadda ka mida.
Xogta la helay ayaa sheegeysa in Gaariga la qarxiyey uu ka mid ahaa ilaalada Guddoomiye ku xigeenka Amniga maamulka gobolka Banaadir Cali Yare Cali, kaas oo ka yimid dhinaca degmada Dayniile, balse aanu xilligaasi la socon, waxaana qasaare kasoo gaaray qaar ka mida ilaaladiisa.
