Wararka laga helayo magaalada Baydhaba ayaa sheegaya in ciidamada Amniga Maamulka Koonfur Galbeed ay xireen Saxafiyiin ka tirsan Ururka SJS.
Sida lagu sheegay War degdega oo kaso baxay ururka Saxafiyiinta SJS waxaa saaka saddex ka mida howl-wadeenada ururka SJS laga qabtay garoonka Shaatigaduud ee magaalada Baydhaba, iyagoo kusii jeeday caasimadda Muqdisho.
Xubnaha la xiray ayaa kala ah: Mohamed Ibrahim Bulbul, Hanad Ali Guled iyo Maxamed Bishaar ayaa xarigooda waxaa ka danbeeyay Taliska Nabadsugidda K/Galbeed, waxaana lagu qaaday baabuur nooca dusha ka furan (Cabdi Bile), iyado aan la ogeyn halka la geeyay.
Wararka la helay ayaa sheegaya in maamulka K/Galbeed ay si gaara u doonayeen Weriye Hanad Cali Guuleed oo ka tirsan Warbaahinta Arlaadi, ayna damceen inay la haraan, balse xubnihii kale ay diideen, sidaasina loo wada xiray saddexda xubnood ee ka mida ururka SJS.
Ma jiro wax War ah oo kasoo baxay maamulka K/Galbeed, wuxuuna xariga xubnaha ka tirsan ururka SJS imaanayaan xili ah tababar saxaafadeed ku qabteen magaalada Baydhaba, kaasoo socday muddo 3 maalmood ah.
