Wararka laga helayo magaalada Muqdisho ayaa sheegay in maanta Garoonka diyaaradaha Adan Abdulle Osman lagu qabtay nin laag shakiyeyoo Ajnabi ah.
Ninkan ayaa la sheegay in lagu qabtay xilli uu doonayey inuu raaco diyaarada Ethiopian Airlines ee maanta ku qorneyd, waxaana baaritaankii ugu danbeeyay boorsooyinkiisa oo saddex ahaa laga helay waxyaabo laga shakiyey oo la sheegay inay ahaayeen qasacado ay ku jiraan sunta dadka ka ilmeysiisa.
Ninkan oo warar kala duwan kasoo baxayaan dhalashadaiisa ayaa la sheegay inuu yahay inuu yahay South Afrikan, mana jirto faahfaahin kale oo laga bixiyey, iyadoo laga reebay diyaaradii uu ku qornaa, waxaan weli socda baaritaan ku saabsan waxyaabaha uu watay iyo halka uu u waday.
Diyaaradda Eithopian Airlines ayaa baajisay safarradii ay ku imaan jirtay Muqdisho toddobaadkan arrimo aan la shaacin dartood, iyadoo liiskeeda laga waayey tegistii Garoonka magaalada Muqdisho.
Ciidamada Amniga ee Garoonka Muqdisho ayaa qabtay ninkan, una gudbyey qeybta dambi baarista CID-da Muqdisho. Ma jiro wax war ah oo arrintan ninkan ay kasoo saareen hay’adaha Amniga.
