Faahfaahin dheeraad ah ayaa laga helayaa qarax caawa ka dhacay magaalada Beledweyne, kasoo lala eegtay xildhibaan Aamino Maxamed Cabdi oo mar kale u sharaxneyd kursiga HOP135.
Allaha u naxriiste Xildhibaan Aamino Maxamed Cabdi ayaa caawa u geeriyootay qarax is-miidaamin ah oo lagula eegtay magaalada Baledweyne ee gobolka Hiiraan.
Weerarka lagu dilay Xildhibaan Aamina ayaa ahaa mid aad loo qorsheeyay oo shaki badana dhaliyey, waxaana xaaladda magaalada Beledweyne ay tahay mid aad ukacsan, iyadoo geerideeda aad looga naxay.
Xildhibaan Aamina ayaa si weyn ugu doodi jiray inay cadaalad hesho Ikraan Tahliil oo ku maqan gacanta Hay’adda NISA, waxaana khaarijinteeda ay Xoojineysaa tuhunno badan oo kiiskan ku xeernaa.
Qaraxyo kale ayaa caawa ka dhacay magaalada Beledweyne, iyadoo la maqlay is rasaaseyn, waxaana weli qasan. Qasaaraha dadka dhintay ayaan weli la xaqiijin, waxaana la sheegay in dhimasho dhaawacyo badan ay jiraan.
Waxaa kaloo dadka qaraxyada magaalada Beledweyne ku dhintay ka mida Cali Cabdi Dhuxul oo ka mid ahaa musharixiinta Kursiga HOP058, horeba u soo noqday xildhibaan. Dadka dhawaca soo gaaray waxaa ka mida: Wasiirkii hore ee Waxbarashada C/axmaan Daahir Cismaan, Maxamed Cumar Xaashi iyo xubno kale.
Qaraxa koowaad ayaa ka dhacay afaafka madaxtooyada Beledweyne, halka qaraxa labaad uu ka dhacay qeybta hore ee Isbitaalka weyn ee Beledweyne.
