Iyadoo ay soo dhowaatay Doorashada madaxweynaha Soomaaliya ayaa waxaa soo baxaya xaqiiqada musharixiin badan oo xilkan u taagan, isla markaana iyadoo aan la fileyn buuxiyay shuruudihii diiwaangelinta.
Shuruudaha Doorashada ayaa waxaa ugu darnaa oo musharixiintan culeys ku ahaa lacagta oo markan lagu badiyay is-diiwaan gelinta musharixiinta madaxweynaha oo midkiiba uu bixiyay 30,000 Doolar, laakiin qaar badan oo ka mida musharixiintan ayaa ku qamaaray lacagtooda iyagoo haddana og inaysan qaarkood xitaa heli doonin HAL COD.
Musharixiinta hoos ku qoran waxay qaarkood lacagtaas u bixiyeen inay is muujiyaan, qaar kale waxay rabaan inay is bandhigaan oo mustaqbalka xil uun ka helaan dowladda cusub, qaar ayaa sii xagjira ayaa ula jeeda ku xumeyn musharax kale iyo inuu taariikhdiisa ku darsado.
Hoos ka akhriso qeybta koowaad ee mushariixinta oo ka mida 24 musharax oo xilka madaxweynaha Soomaaliya ee 2017 u taagan.
C/RAXMAAN MAXAMED FAROOLE
Madaxweynihii hore ee Puntland, Xildhibaan ka tirsan Aqalka Sare iyo musharax madaxweyne wuxuu ka mid yahay musharaxiinta isu diiwaangelisay tartanka Doorashada Soomaaliya 2017. Rajada C/raxmaan Faroole ayaa ah mid aad u yar oo wareega koowaad ku siman, waxaana musharaxnimadiisa lagu sheegay inay salka ku heyso bandhig iyo xil uu u raadinayo wiilkiisa.
MAXAMUUD MAXAMED CULUSOW
Waa guddoomiyihii Bankiga Dhexe ee Soomaaliya dowladii KMG ahayd, waxaa xilka ka qaaday madaxweyne C/llaahi Yuusuf, wuxuu u wareegay Mareykanka isagoo noqday guddoomiyaha siyaasadda beeshiisa, kadibna wuxuu ahaa aqoonyahan wax badan ka qora Soomaaliya oo dhaliila qaabka federaalka. Rajadiisa waa mid aad u liidata waxayna dad badan aaminsan yihiin kharashka iyo dadaalka ka baxay inuusan ka badneyn sidii uu xil wasiir ama safiir uga heli lahaa dowlada cusub.
CADDOW CALI GEES
Waa ganacsade siyaasadda u maalgashaday inuu danahiisa ganacsi ku ilaashado, wuxu lacag fara badan ku bixiyay kursiga xildhibaanimo, waxaana ujeeda ugu weyn ee Caddow (C/llaahi) Cali Gees ka leeyahay musharaxnimada ay tahay laba arrimood oo kala ah: Inuu ku xumeeyo Xasan Sheekh oo ay isku beel yihiin oo xiisad siyaasadeed dhex martay iyo inuu awoodiisa lacageed ku muujiyo oo siyaasadda saameyn ku yeesho. Xildhibaanada uu lacagta ku soo jiitay waxaa la yaab noqon doonta haddii uu wareega labaad u gudbo.
ENG. C/LLAAHI CALI XASAN
Wuxuu isu sharxay kursiga Baarlamaanka beeshiisa, kaasoo uu ku soo bixi waayay, waxaana ka guuleystay musharixii ay wadatay madaxtooyada ee Saadaq C/kariin. Musharax Injineer C/llaahi waxaa la sheegay in madax xanuunkii uu ka qaaday magaalada Cadaado iyo tartankii kursiga Baarlamaanka ay ku dhalisay inuu madaxweyne isu sharxo. Rajadiisa waa mid hooseysa oo wareegga koowaad ku eg; laakiin wuxuu kharashka u bixiyay inuu ag istaago musharaxa ay isku beesha yihiin ee Xasan Sheekh o dhaafsiiyay kursigii xildhibaannimo, waxaana farxad u ah inuu Xasan Sheekh la tartamo.
BASHIIR RAAGE SHIIRAAR
Waa ganacsade iyo hogaamiye kooxeed hore; ma ma ahayn musharax la filayay inuu xilkan isu soo taago. Muddo dheer ayuu siyaasadda ka maqnaa tan iyo soo if bixii maxkamadaha, laakiin waxaa dhiirigelin u noqotay in siyaasadda Soomaaliya ay noqotay mid la maalgashado. Rajadiisu waa mid aad u yar, waxaase ujeedkiisa ugu weyni noqon karaa inuu is muujiyo isuna bandhigo qofka laga yaabo inuu madaxweyne noqdo si uu mustaqbalka u soo galo dowladda cusub.
C/LLAAHI CIILMOOGE XERSI
Waa wasiir hore oo ka tirsanaa dowlada waqtigeedu dhammaaday, wuxuu isu sharxday madaxweynaha Jubbaland oo si aan la ogeyn uga haray markii danbe. C/llaahi Ciilmooge wuxuu ka mid yahay siyaasiyiinta xilalka wasiirnimo dhadhamiyay ee tan iyo markii uu waayay xilka wasiirnimo aan cag dhigin ee raadinayay si uu mar uun xil ugu soo laaban lahaa. Kuma jiro musharixiinta xitaa beel ahaan ay tahay inay xilkan qabtaan, waxaana musharaxnimadiisa loo arkaa qamaar siyaasadeed oo is muujin salka ku heysa.
SAKARIYE MAXAMUUD CABDI
Wuxuu ka mida ahaa dowladii Carte, wuxuu wasiir ka noqday dowladaasi, isagoo ah siyaasi muddooyinkan dambe ka dhex muuqday marka laga reebo dowladii ugu danbeysay oo aanu wax xil ah qaban. Wuxuu ka mdia ahaa musharixiintii isu sharxay xilka madaxweynaha sanadkii 2012. Rajadiisa kama duwana doorashaduii 2012 oo helay hal cod, laakiin ujeedka ugu weyn waxaa lagu sheegay inuu ka mid noqdo, jago-na ka helo dowladda cusub.
