Madaxweynaha xilkiisu dhammaaday Maxamed C/llaahi Farmaajo ayaa Gobolka Gedo u diray sarkaalka sare ee uu hoostago mamulka Gobolkaasi, dhowaanna noqday xildhibaan laga soo doortay Galmudug C/llaahi Aadan Kulane (Jiis).
Qorshaha Sarkaalkan xildhibaanka noqday ku tegay maanta degmada Doolow ayaa la sheegay inuu la xiriiro abaabulka dadka degaanka iyo arrin ay damacsan tahay kooxda Farmaajo oo ku saabsan maamulka Jubbaland, iyo howlgallo ciidan oo lala kaashanayo ciidamada Itoobiya.
C/llaahi Kulane oo Doolow Galabta ka hadlay ayaa sheegay inuu halkaasi u tegay la-tashi uu la samayn doonnaa waxgaradka Gobalka, wuxuuna intaas ku daray inuu u yimid Gedo metelaadda Gobolka oo isbaaro siyaadeed loo dhigtay iyo 16-kii xildhibaan ee laga soo dooran lahaa Gedo.
“Waxaa idin muuqda, waxaan idinkaga digeynay labadii sano e lasoo dhaafay.., waxaan idin sheegeynay maanta ayey idin cad yihiin haddii sharafkiinii iyo metelaadiinii lagu dhegan yahay, waxaan rabaa inaan ka tashano..” ayuu Kulane Jiis ka yiri magaalada Doolow.
Kuraasta taalla magaalada Garbahaarey ayaan weli xal loo helin sidii lagu dooran lahaa, iyadoo arrintaasina ay ahayd qodobka ugu weyn ee ay u fashilmeen shirarkii Doorashada ee Dhuusamareeb ee keenay in Farmaajo laga wareejiyo maamulka Doorashada Dalka.
