Madaxweynaha muddo xileedkiisu dhammaaday Maxamed C/llaahi Farmaajo ayaa wareegto uu caawa soo saaray ku magacabaay Guddi cusub oo soo baara Kiiska Ikraan Tahliil Faarax.
Wareegtada Farmaajo ayaa lagu sheegay in Kiiska Sarkaalad Ikraan Tahlil uu yahay mid xasaasi ah, una baahan baaritaan hufan, sidaas darteedna uu magacaabay Guddi uu hoggaaminayo Xeer ilaaliyaha Qaranka, xeer ilaaliyaha Maxkamadda cidiamada iyo xubno ay soo magacaabayaan talisyada Booliska, Milateriga iyo Nabadsugidda.
Tallaabadan ayaa loo arkaa inuu Farmaajo kula wareegayo kiiska Ikraan oo lagu tuhunsan yahay madaxda Hay’adda NISA, isla markaana meesha uga saarayo Guddi uu hore u magacaabay Xeer ilaaliyaha Maxkamadda ciidamada.
HOOS KA AKHRISO WAREEGTADA FARMAAJO
MADAXWEYNAHA J.F.S., Markuu Arkay: Qodobka 87aad ee Dastuurka Jamhuuriyadda Federaalka Soomaaliya ee xusaya in Madaxweynaha Jamhuuriyadda Federaalka ee Soomaaliya yahay Astaanta Midnimada Qaranka iyo llaaliyaha iyo horumariyaha mabaadi’da asaasiga ah ee Dastuurka.
Marka uu Arkay: Qodobka 90(b) Dastuurka ee xusaya in Madaxweynuhu yahay Taliyaha Guud ee Ciidamada Qalabka Sida.
Marka uu Arkay: Qodobka 126(6) ee Dastuurka ee xusaya in hay’adaha amniga qaranka oo ah kuwa hubka sita ay kormeeraan oo koontaroolayaan hay’adaha rayidka ah.
Marka uu Garwaaqsadey: in kiiska Sarkaalad Ikraan Tahlil uu yahay mid xasaasi ah oo u baahan baaritaan hufan.
Markuu Tixgaliyey: In ay lagama maarmaan tahay in kiiskan cadaalad laga gaaro lana helo baaritaan rasmi ah. Waxa uu xeeriyay:
Qodobka 1aad
Waxaa la magacaabay guddi qaran oo kiiskan baara kana kooban:
1. Xeer llaaliyaha Guud ee Qaranka Guddoomiye
2. Xeer llaaliyaha Guud ee Maxkamadda Ciidamada Qalabka Sida Guddoomiye-ku-xigeen
3. Xubin uu soo magacaabo Taliyaha Ciidanka Booliska Soomaaliyeed Xubin
4. Xubin uu soo magacaabo Taliyaha Ciidanka Xoogga Dalka Soomaaliyeed Xubin
5 Xubin uu soo magacaabo Taliyaha Hey’adda Nabad -Sugidda & Sirdoonka Qaranka Xubin
Qodobka 2aad
Guddigan waxaa la farayaa in hawshooda si xilkasnimo ah u gutaan, warbixinta baaristana u gudbiyaan hay’adaha sharciyadda u leh.
Qodabka 3aad
Waxa uu Xeerkan Dhaqangelayaa isla maalinta la JFS saxiixo waxaana lagu soo daabici doonaa Faafinta Rasmiga ee J.F.S.
