Madaxweynaha waqtigiisu dhammaaday ee Maxamed Cabdullaahi Farmaajo ayaa mar kale shir isugu yeeray madaxda Dowlad Goboleedyada iyo Gobolka Banaadir, sida lagu sheegay war kasoo baxay madaxtooyada Soomaaliya.
Qoraalka Madaxtooyada ayaa lagu sheegay in Shirka uu ku saabsan arrimaha Doorashooyinka, kana furmayo 15-ka bishan Febraayo magaalada Garoowe ee Dowlad Goboleedka Puntland, kaasoo dhameystir u ah fulinta heshiiskii ay Golaha Wadatashiga Qaran ku gaareen magaalada Muqdisho 17kii Sebteembar 2020.
“Dowladda Federaalka Soomaaliya waxay sii xoojinaysaa dadaalkeeda ku aaddan sidii dalka looga hirgelin lahaa doorashooyinka, loogana wada hadli lahaa arrimaha lagu kala aragti duwan yahay iyada oo aasaasku yahay dhaqangelinta heshiiskii ay ansixiyeen Golaha Shacabka iyo Aqalka Sare 26kii Sebteembar 2020” ayaa lagu soo gabagabeeyay qoraalka madaxtooyada.
Arrintan ayaa imaaneysa kadib cadaadis ay beesha Caalamka saartay Madaxweynaha muddo xileedkiisu dhammaaday, si loo qabto shir kale oo xal looga gaaro khilaafka fulinta Doorashada ka taagan.
Farmaajo ayaa khudbadiisii golaha Shacabka uu ka jeediyay 6-dii Febraayo ku eedeeyay Madaxweynaha Puntland inuu isagu qoray heshiiskii Doorashada 17-ka Septembar, isla markaan uu hortaagan yahay.
