Dowlad Goboleedka Puntland ayaa taageero milateri oo isugu jirta Hub iyo Gaadiid ku wareejiyay Galmudug, taasoo ka danbeysay markii uu madaxweynaha muddo xileedkiisu dhammaaday Maxamed Farmaajo ka hor istaagay codsi taageero milateri ah.
Puntland ayaa 8-Gaari oo kuwa dagaalka ah oo qoryo saaran yihiin, Gaari Ambulance ah iyo Booyad maanta ku wareejisay Galmudug, kadib kulan amni oo ka dhacay magaalada Gaalkacyo, kaasoo ay ka qeyb galeen Wasiirka Amniga Galmudug iyo mas’uuliyiin ka tirsan Puntland.
Farmaajo ayaa dhowaan diiday taageero gaadiid iyo hub uu siiyo Galmudug markii uu codsi taagero hordhacay Madaxweynaha Galmudug Axmed Qoorqoor, kadib dadgaal qaraar oo degaanka Camaara ku dhex maray Alshabaab iyo ciidamada Galmudug oo gaadiid, hub iyo sanad looga qabsaday Galmudug (Halkan ka akhriso).
Guddoomiyaha Gobolka Mudug ee Puntland C/ladiif Muuse Sanyare ayaa sheegay in Walaalahood Galmudug ay ku wareejiyeeny Gaadiid Isugu jira kuwa Dagaalka, Gaariga Caafimaadka, Booyad iyo Hub kuwaas oo ay ugu talo galeenin ay qeyb ka noqdaan Dagaalka lagula Jiro Kooxda Argagixisada ee Alshabaab oo looga xoraynayo Deegaanada Koonfurta Gobolka Mudug.
“Dowladda Puntland iyo Shacabkeeduba waxay markasta diyaar uyihiin qayb ka noqoshada Dagaalka Argagixisada iyo Taageerada Walaalahood Galmudug si niyadsami leh, insha allaah waana ka guulaysan doonaa Argagixisada wayna soodhamaatay wakhtigii ay Shacabka iyo Degmooyinka Soomaaliyeed u afduubnaan jireen” ayuu yiri Guddoomiye Sanyare.
Wasiirka Amniga Galmudug Axmed Macalin Fiqi ayaa dhinaciisa sheegay inay maantay la wareegeen gaadiid iyo saanad ciidan oo qeyb ka noqon doona hawlgalka ka dhanka ah argagixisada Shabaab ee duulaanka ku soo qaaday qeybo ka mid ah Galmudug.
“Waxay labada maamul iyo shacabkooduba ee PUNTLAND iyo GALMUDUG ay u midoobeen dagaalka lagula jiro argagixisada iyo in dhiigga la isku darsado, ayadoo lagu salaynayo wadahadalkii todobaadkii tagey ay magaalada Muqdisho ku yeesheen labada hogaamiye ee Galmudug iyo Puntland” ayuu yiri Wasiir Fiqi.
Wuxuu Mahadcelin gaar ah u jeediyey madaxweynaha Puntland Md. Siciid C/laahi Deni iyo mas’uuliyiinta kale ee Galmudug u muujiyey garab istaagga iyo iskaashiga dhinac walba leh.
