Laascaanood (Wadani Online) – Garaadka guud ee SSC-Khaatumo, Garaad Jaamac Garaad Cali, ayaa fariin cad u diray madaxda siyaasadeed iyo dhaqanka ee Somaliland, isagoo ugu baaqay inay si dhab ah u qaataan nabad aan shuruud lahayn, isla markaana ka tanaasulaan damaca ku aaddan in dib loo qabsado deegaannada SSC-Khaatumo.
Garaadka oo hadal jeediyay ayaa sheegay in bulshada deegaanka SSC-Khaatumo aysan diyaar u ahayn in la maquuniyo, isla markaana aysan Somaliland awood u lahayn inay ku qabsato SSC-Khaatumo dagaal iyo nabad toona.
Wuxuu xusay in hadallada Somaliland ee sheegaya in “Sool Bari nabad lagu soo celinayo” ay yihiin kuwo aan waaqica ku salaysnayn oo aan waxba ka beddeli doonin xaqiiqada dhabta ah ee deegaanka ka jirta.
“Walaalayaalow labo mid aan idinka helno. ‘Nabad baan ku soo celinaynaa Sool Bari’ waa hadal liita. Nabad iyo colaad midna kuma soo celin kartaan SSC. Haddii aad leedihiin ‘dagaalkii horaa naga xumaaday ee saraakiisha noo soo daaya’, oo aad leedihiin ‘dhaqaalihii waa nagu yaryahay ee jidka noo fura’, taas waa af aan garan karno. Laakiin haddii aad hunguri u qabtaan dhulkayaga, ogow idinkana dhulkiinna uma soconayno,” ayuu yiri Garaadka.
Garaad Jaamac waxa uu sheegay in Somaliland ay wajahayo fursad muhiim ah oo ah in ay kala doorato laba waddo oo kala ah: colaad toos ah ama nabad buuxda oo ay ku ixtiraamayso jiritaanka maamulka SSC-Khaatumo.
“Waan leeyahay dagaalka dani kuma jirto, laakiin nimankii dhibku inaga dhexmaray ilaa iyo hadda nabad kama hayno. Aan ka reebo Suldaan Daa’uud Suldaan Maxamed Suldaan Cabdiqaadir oo war cad noo sheegay, kuna dhawaaqay nabad. Guryihiinna kuma soconayno, kayaguna in aad ku soo duushaan ma ogolin,” ayuu yiri Garaadku.
Garaadku wuxuu hoosta ka xarriiqay in dadka deegaanka SSC aysan doonayn in ay la dagaallamaan walaalahooda reer Somaliland, balse aysan sidoo kale ogolaan karin in la inkiro maamulka ay dhisteen ee SSC-Khaatumo oo ay dowladda federaalka ah si rasmi ah u aqoonsatay.
Hadalka Garaad Jaamac ayaa imanaya xilli ay weli taagan tahay xiisadda siyaasadeed ee u dhexeysa Somaliland iyo maamulka SSC-Khaatumo, kaasoo xukunkiisa si weyn uga hana qaaday gobollada Sool, Sanaag iyo Cayn tan iyo markii dagaallo culus ay bishii February 2023 ka dhaceen Laascaanood.
Si kastaba, dhowaan ayay ahayd markii Garaad Jaamac iyo Suldaanka Guud ee Somaliland, Suldaan Daa’uud Suldaan Maxamed, ay si wadajir ah ugu dhawaaqeen baaq nabadeed, taasoo loo arkayay dadaal lagu yaraynayo xiisadda ka aloosan waqooyiga Soomaaliya.
Siyaasiyiinta iyo madax-dhaqameedka reer SSC ayaa marar badan ku celiyay in aanay aqbali doonin in laga arrimiyo Laascaanood iyo agagaarkeeda iyada oo laga maamulayo Hargeysa, iyagoo ku adkeysanaya in xal siyaasadeed oo suurtagal ah uu yahay in loo madax-bannaanaado aaya-ka-tashiga dadka deegaanka.
