Golayaasha Wasiirada maamul Goboleedyada Puntland iyo Jubbaland ayaa si isku mida uga hadlay xaaladda Doorashada, kadib shirar ay ku kala yeesheen magaalooyinka Garowe iyo Puntland.
Golaha Wasiirada Puntland ayaa war kasoo baxay lagu sheegay in shirka todobaadkan looga hadlay Doorashada Soomaaliya,iyadoo madaxweynaha Puntland Siciid Cabdullaahi Deni uu ka warbixiyay xaaladda dalku marayo iyo dadaalka ay geliyeen in la xaliyo oo laga heshiiyo tabashooyinka ka dhashay hirgelinta heshiiskii 17-ka September 2020.
Deni ayaa sheegay in Puntland marwalba kaalin muhim ah ka qaadanayso sidii dalku uga gudbi lahaa marxaladda uu ku jiro, waxayna soo jeedisay in y muhim tahay in dhakhso shir la isugu yimaado oo lagu qabto Muqdisho madaama Hay’adda Dastuuriga ah ee DFS wakhtigoodu dhammaaday, Shirkuna u baahanyahay wakhti badan in la geliyo, Saamileyda Siyaasadda, Beesha Caalamka iyo dhammaan dhinacyada ay khuseysona ay halkaasi wada joogaan.
Dhinaca kale Golaha Wasiirada Jubbaland oo uu guddoomiyey Axmed Madoobe ayaa lagu falanqeeyay Xaalada Siyaasadda dalka iyo mudo xileedka Dowlada Federaalka ah ee dhamaaday, waxayna isku raaceen in Jubaland ay sii wado dadaalka la xiriira sidii heshiis rasmi ah looga gaari lahaa arimaha Doorashada.
Labada maamul ee Puntland iyo Jubbaland ayaa isbaheysi siyaasadeed leh, waxaana khilaaf kala dhaxeeyaa madaxweynaha xilka ka dhammaaday ee Soomaaliya Maxamed C/llaahi Farmaajo oo ku baaqay shir 15-ka Febraayo ka dhacaya magaalada Garowe.
