Guddiga Doorashada Gobolada waqooyi Somaliland SEIT ayaa qabtay doorashadii ugu degdegga badneyd oo ay kusoo baxeen saddex kursi oo ka mida Baarlamaanka Federaalka.
Doorashada maanta oo aan si toos ah loo tebin, ayaa daqiiqado gudahood lagu soo dhammeey, waxaana saddexda kursi kusoo baxay dadkii la filayay, iyadoo dhammaan musharixiintii la tartami lahaa xildhibaannada kuraastooda difaacanayey ay isaga hareen tartanka.
Kursiga HOP247 waxaa u sharaxnaa Khadra Maxamed tukaale, iyo Filsan Jaamac Cismaan. Waxaa tartanka ka hartay Filsan Jaamac Cismaan; halkaasoo cod gacantaag ah 100 ergo ay ku heshay Khadra Maxamed Tukaale, sida uu shaaciyey Guddiga SEIT Somaliland. Khadra Maxamuud ayaa hore ugu fadhiday Kursiga HOP247 ee golaha shacabka BJFS oo mar kale kusoo laabatay.
Kursiga HOP245 waxaa kusoo baxay Cabdiraxmaan Axmed Suge oo hore ugu fadhiyay kursiga. Kursigan waxaa tartanka isaga haray Musharax Aadan Giire Cabdiiye. Codkii gacantaagga ee kalsoonida markii loo qaaday xildhibaan Cabdiraxmaan Axmed wuxuu helay 100 cod.
Kursiga HOP215 waxaa isna kusoo baxay xildhibaan Ayuub Ismaaciil Yuusuf oo hore u ahaa sanator ka tirsan aqalka Sare. Waxaa tartanka isaga haray Musharax Axmed Yuusuf Bakaal. Cod gacantaag ah oo loo qaaday xildhibaan Ayuub Ismaaciil Yuusuf ayaa waxaa taageeray ergo 94 qof.
Kursiga HOP214 waxaa kusoo baxay Dr. Cilmi Maxamed Nuur, kadib markii uu isna tartankii ka hartay musharax Tusmo Jaamac Liibaan. Codklii gacantaagga ahaa ee loo qaaday xildhibaan Cilmi Maxamed Nuur oo kursiga hore ugu fadhiyey ayuu helay kalsoonida 100 qof oo ergo ahaa.
Doorashada maanta oo afar kursi lagu so osaaray muddo ka yar 2 saacadood ayaa ahayd tii ugu degdegta badneyd ee kuraas intaas ah lagu soo baxo, mana jirin wa tartan ah oo dhacay. Kursi kasta waxaa ku qornaa Xildhibaan diyaarsan iyo qof malxiis ah, waxaana dhammaan lagu dhammeeyay cod gacantag ah, iyadoo aanu jirin Sanduuq la furay.
Sidoo kale waxaa Magaalada Muqdisho ka dhacday Doorashda Kursiga HOP209 oo uu hore ugu fadhiyey, kana geeriyooday Xildhibaan Axmed Dhimbil Rooble. Waxaa kursigan ku guuleystay Maxamed Xuseen Haadi.
Kursiga HOP211 waxa kusoo baxday Caasho Koos Maxamuud oo hore ugu fadhiday, kana mid ahayd Baarlamaankii 10-aad ee Federaalka.
Dr. Cabdilaahi Xaashi Abiib ayaa kusoo baxay kursiga HOP201 ee Golaha shacabka BJFS, kaasoo uu hore ugu fadhiyey Wasiirkia Maaliyadda C.raxmaan Beyle (Halkan ka Akhriso sida uu uga haray)
Kursiga HOP257 waxaa ku guuleysatay Nadra Saalax Cabdi, waxaana kursiga hore ugu fadhiyay Cabdalla Xaaji Cali Axmed.
Kursiga HOP260 waxaa ku guuleystay Sulayman Cali xuseen, isagoo helay 62 cod, Halka ay heleen musharaxiintii usoo gudbay wareega labaad ee la tartamay kala heleen Filsan Axmed Ismaail oo heshay 22 cod iyo Cabdinaasir Axmed Garow oo helay 15 cod. kursigan waxaa hore ugu fadhiyey Faadumo Odawaa Raage.
9-ka Xildhibaan ee maanta lagu doortay magaalada Muqdisho, kana soo jeeda Gobollada Waqooyi ayaa kala ah:
1- Khadra Maxamed Dukaale
2- Cabdirahman Axmed Suge
3- Ayuub Ismaacil Yuusuf
4- Dr. C/llaahi Xaashi Abiib
5- Dr. Cilmi Maxamed Nuur
6- Mohamed Xuseen Haadi
7- Caasha Koos Maxamuud
8- Nadra Saalax Cabdi
9- Suleyman Cali Xusen
