Guddiga Xalinta Khilaafkada Doorashada dadban ayaa iska diiday xil ka qaadista uu 7 xubnood oo ka mida uu ku sameeyay Ra’iisal wasaare Maxamed Xuseen Rooble.
Qoraal ay soo saareen goor dhoweyd ayey ku doodeen inay sharci darro tahay xil ka qaadista uu ku dhaqaaqay Ra’iisal wasaaraha, isla markaana aysan u hoggaansami doonin, iyadoo ku eedeeyay Rooble inuu arrimo uu rabo ku cadaadinayey.
Xuseen Maxamed Maxamuud Laki, ayaa tallaabada Ra’iisal wasaaraha ku timaamay mid sharci darro ah oo uusan xaq u lahayn in uu guddigaas xilka ka qaado, Wuxuuna sheegay in muddooyinkan Ra’iisal wasaaruhu ku cadaadinayey in wuxuu rabo loo sameeyo, asagoo sheegay in markii ay iska diideen waxyaabaha qaar sidaas xilkii looga qaaday.
“Waxaan u arkaa go’aan sharci darro ah oo qar iska tuurnimo ah oo aan meelna ka soo gelin habraaca doorashooyinka iyo nidaamka aanu ku shaqaynaynno” ayuu yiri Xuseen Laki.
HOOS KA AKHRISO WAR-SAXAAFADEEDKA
GUDDIGA XALLINTA KHILAAFAADKA DOORASHOOYINKA
Taariikh: 18/12/2021.
WAR-SAXAAFADEED
Guddiga Xallinta Khilaafaaadka Doorashada Dadban (GXKHDD) ee 2020/2021 waa Guddi madax-banaan waxaana lagu dhisay Heshiiskii 17 Septembar 2020, iyo Habraacii 1-da October ee ay soo saareen Golaha Wadatashiga Qaranka. Sidoo kale waxaa wax ka badal lagula sameeyay Guddiyada Doorashada heerarkooda kala duwan Heshiiskii Arimaha Doorashooyinka ee Golaha Wadatashiga Qaranka 27 May 2021 Qodobkiisa 1 and ka dib markii Goluhu isla gartay in Guddiyada kala duwan laga saaro xubno ka tirsanaa shaqaalaha xafiisyada Dawlada iyo Ciidamada dawlada, iyada oo loo soo xulay xubno madaxbanaan oo la hubiyay dhexdhexaadnimadooda.
Guddiga Xallinta Khilaa faadka Doorashada Dadban 2020/2021 wuxuu cadeynayaa;
1- In uu aad uga xun yahey warqada ka soo baxday Xafiiska Raysal Wasaaraha maanta oo taariikhdu tahay 18/12/2021 ee ujeedkeedu ahaa xil ka qaadista Gudoomiyaha Guddiga oo ay wadar ogol ku doorteen dhamaan xubnaha guddiga iyo xubno ka mid ah Guddiga Xallinta Khilaafaadka oo ahaa xubno muhiim u ah geedi socodka doorashada oo muddo shaqaynayay kasbadayna aqoon iyo khibrada dheeri ah.
2- In hanaanka loo maray xilka qaadista xubnahaas uu yahay mid baal marsan Heshiiskii 17 Septembar 2020, Habraacii 1-da October ee lagu dhisay Guddiga Xallinta Khilaafaadka Doorashada Dadban 2020/2021 Qodobkiisa laad Mabaadi’da lagu dhisay Gudiga Xallinta Khilaafaaadka doorashada Dadban 2020-2021 oo qeexaya” Guddiga Xallinta Khilaafaaadka doorashada Dadban 2020-2021 waa lagu dhisay Mabaadi’da Guud ee Hannanka madar-bannaan oo lagu xalliyo khilaafaadka ka dhasha doorashada,” waxayna arintaasi meel ka dhac wayn ku tahey madaxbanaanida guddiyada Doorashada oo dhan gaar ahaan Guddiga Xallinta Khilaafaaadka doorashada Dadban 2020-2021.
3- In hanaanka saxda ah oo ay tahay in loo maro wax ka badalka xubnaha guddiyada Doorashada heerarkooda kale duwan waa in uu noqdo go’aan ay ay wada gaareen Golaha Wadatashiga Qaranka.
4- In uu si gaar ah uga xun yahay una cambaaraynayaa hanaankii argagaxa ahaa ee uu Wasiirka Amniga Xukummada Federaalka Soomaaliya Cabdulaahi Maxamed Nuur ula dhaqmay dhamaan xubnaha guddiga ka dib markuu xarunta guddiga la soo galay ciidamo hubaysan asagaoo xayiraad, handadaad iyo cagojuglayn u gaystay xubnaha guddiga kuna amray in ay hal saac gudahood uga guuraan xaruntooda haddii kala ay mutaysan doonaan ciqaab xarig ah, taasoo xadgudub ku ah xasaanada xubnaha guddiga, sharaf dhacna ku ah xukuumada Federaalka Soomaaliya.
Ugu danbeyn, Guddiga Xallinta Khilaafaaadka Doorashada Dadban (GXKHDD) ee 2020/2021, si uu u guto waajibaadkiisa shaqo si waafaqsan Heshiiskii 17 Septembar 2020 iyo dhamaan Habraacyadii ka soo baxay Golaha Wadatashiga Qaranka dhawrayana hufnaanta doorashada si ay u dhacdo doorasho hufan oo cadaalad ah, wuxuu ka codsanayaa Golaha Wadatashiga Qaranka inay ilaaliyaan madaxbanaanida guddiga xallinta khilaa faadka ayna jawaab u dhiganta ka bixiyaan xil ka qaadista sharci darada ah iyo xadgudubyada lagula kacay Guddiga Xallinta Khilaafaaadka Doorashada Dadban (GXKHDD) ee 2020/2021.
