Gudoomiyaha Xisbiga Himilo Qaran Xildhibaan Suleymaan Maxamuud Xaashi ayaa faahfaahin ka bixiyey safarkoodii caqabadaha la kulmay iyo hadal kasoo yeeray Madaxweynihii hore Shariif Sheekh Axmed oo dood weyn dhaliyey.
Wuxuu sheegay in safarkoodii magaalada Beledweyne ee xayiraadda la kulmay ay sabab u ahayd iyadoo ra’iisal wasaaraha xukuumadda Xasan Cali Kheyre uu doonayey inuu tago magaalada Beledweyne, sidaasina halis loo geliyey naftooda, oo lagu doonayey in diyaaradaasi uu shidaalka ka dhammaado, kadibna dadka saaran lagu waayo; taasoo ahayd kutalagal ay ka dambeysay laanta fulinta dowladda Soomaaliya.
Isagoo u warramay Universal TV ayaa la weydiiyay hadalkii kasoo yeeray Shariif Sheekh Axmed ee uu ku dhaartay inuu dalka ka saarayo dowladda hadda jirta, ayuu sheegay inay nasiin darro tahay in yar oo ka mida laga soo qaato oo la buunbuuniyo
“Nin waliba meeshii uu daneynayey ayuu uga faa’iideystay. Qof diyaarad laga ridi gaaray ama dad la halaagi gaaray ayaa hadal nagu yiri.. waa mas’uuliyadda darro iyo ixtiraam darro.. waana boor isku qaris khudbad dheer oo meelo badan ka hadleysay laga soo qaato kalmad yar..” ayuu yiri guddoomiyaha Xisbiga Himilo oo sheegay in ujeedo qaloocan laga leeyahay hadalka.
“Waxaa lasoo qaatay Itoobiyaan.. Mooryaantii iyo Alshabaab oo dalka laga saaray.. dowladda xoog kuma imaan waxayse dowladda kooxdaasi ka shabaheysaa markii ay awood iyo ciidan adeegsadaan oo ay ka tagaan sharcigii lagu xaq dhowrayey, waxayna la mid noqonayaan kuwii sharci darrada ku dhaqmayey ee dagaal-oogayaasha, shabaabka iyo Itoobiyaanka… inta ay sharciga dhowrayaan waa dowlad la wada leeyahay..” ayuu yiri Guddoomiyaha Xisbiga Himilo oo ku eedeeyay dowladda Soomaaliya inay kharash badan ku bixisay qaloocinta hadallada iyo dad ay u adeegsato.
Wuxuu sheegay in dowladda aan ku dhaqmin sharciga ay dadka iska tuuri karaan iyagoo adeegsanaya qabaab kala duwan, sida kacdoonkii dalka Suudaan ee xukunka looga tuuray Cumar Albashiir, iyadoo sidoo kale uu tilmaamay in loo mari karo Baarlamaanka iyo halgan hubeysan.
“Yeey isku reer yihiin oo lacag la siiyaa si uu uga daba hadlo (SHEEKH SHARIIF)… dad ka shaqeynaya miyaa qabiil ka shaqeynaya.. mise qof aan lagu aqoon qabiil ee xuquuqdiisa u doodaya..?” ayuu yiri guddoomiyaha Xisbiga Himilo.
HOOS KA DAAWO
