Weerar nooc cusub ayaa ka dhacay magaalada Muqdisho, kadib markii weerar Mindiyo loo adeegsaday lagu qaaday guddoomiyihii Maxkamadda Gobolka Sh/hoose Siciid Cumar Xasan.
Weerarka oo ay qaadeen Rag ku hubeysnaa Mindiyo ayaa ka dhacay degmada Wadajir ee magaalada Muqdisho, waxaana lagu dilay guddoomiyihii Maxkamada gobolka Sh/hoose Siciid Cumar Xasan oo loo yiqiin Subeyr, kaasoo isna toogtay mid ka mida raggii weerarka ku qaaday.
Wararka ayaa sheegaya in Gudoomiye Subeyr uu ku hubeysnaa Bistoolad, isagoo dhaawac gaarsiiyey mid ka mida raggii Mindiyaha ku weerarray, waxaana falkaasi ka dhashay geerida guddoomiyah Siciid Cumar a iyo ninkii uu toogtay oo labaduba u geeriyooday dhaawacyadii soo gaaray.
Qaar ka mida Qoyska Marxuumka iyo Gudoomiyihii Maxkamadda Shabeelaha Hoose ayaa sheegay inuu muran dhex maray Saciid iyo labadii qof ee weerarka Mindiyaha ku qaaday, iyadoo aan la garan ujeedada weerarka iyo sababta keentay inay isku dhacaan.
Dhacdadan ayaa noqotay mid ku cusub magaalada Muqdisho, waxaan weli wax war ah kasoo saarin maamulka degmada Wadajir iyo hay’adaha amniga caasimadda.
