Guddoonka Baarlamaanka Federaalka Soomaaliya ayaa xalay xilli danbe farriin u kala diray xildhibaannada, taasoo lagu sheegay inuu baaqday fadhigii Baarlamaanka ee maanta.
Farriinta loo dira xildhibaannada ayaa u qorneyd sidatan: Kulankii Xildhibaanada Golaha Shacabka Baarlamaanka Federaalka Soomaaliya ee maanta oo isniin ah loo balansanaa ayaa baaqday xaqiijin guntin (kooram) awgeed.
Ma jirto faahfaahin laga bixiyey kooram la’aanta loo baajiyey kulanka maanta oo ah mid ay sii ogaadeen guddoonka, iyadoo aan la isugu imaan kulanka, waxayna arrintan dhaceysaa markii ugu horeysay in kooram la’aan kulan loo baajiyo, iyadoo aan la tegin xarunta Golaha.
Waxaa hore xildhibaannada loogu diray ajendaha maanta oo ka koobnaa laba qeybood oo kala ah hadal-jeedinta guddoomiyaha Baarlamaanka iyo warbixinta Guddiga dib u eegista Dastuurka.
Mooshin ay doonayaan xildhibanno ka horjeeda xukuumadda oo ah in ajende laga dhigo xaaladda amniga dalka ayaan lagu darin ajendaha, iyadoo muran ka taagan yahay arrintaasi oo sababtay baaqashada kulamadii ugu horeeyay ee kalfadhiga 5-aad.
